Politikkikkut tatisimanninneq, mitalliinerit ataqqinninngitsumilluunniit iliornerit atorlugit Nunatta pisuussutai tuniniagassaanngillat. Naamerluinnaq.
Illit, naalakkersuisoqarfivillu Kalaallit Nunaata pisuussutaanut soqutiginninneq takutitarsi pisussaaffiliivoq. Inatsisitiguinnaq pinnani, aammali ileqqorissaarnikkut kiisalu politikkikkut. Nunatsinnik, inuiaqatigiittut ingerlatsivitsinnik, ilitsinnik kiisalu innuttatsinnik nikassaaneq tatiginninnermik sumilluunniit aserorterisarpoq. Tatiginninnerlu piunngippat sumilluunniit piiaasoqassanngilaq. Siorannguamilluunniit naamik.
Kommunitsinni innuttaasut nunaminni pisunik aarlerissuteqarnissaat borgmesteritut akuersaarsinnaanngilluinnarpara - politikkikkuuppat, aningaasaqarnikkuuppat isumannaallisaaneruppalluunniit. Pissaanilissuit pinnaanneranni Nunarput najukkavullu atornerlunneqassanngillat.
Nunatsinni aatsitassarsiornermut inatsisit Nunani Avannarlerni sukanganerpaanut ilaapput. Taakku inuit, pinngortitaq kinguaassallu illersorniarlugit aalajangersarneqarsimapput. Inatsisit taakku tamakkiisumik malinneqartussaapput - apeqqutaatinneqanngilaq kina piiaanissamik kissaateqarnersoq, kiisalu nuna piiaaniartoq qanoq angitiginersoq pissaaneqartiginersorluunniit. Isumaqatigiinniutissaanngillat.
Inuiaat kalaallit nunartik pisuussutaalu oqartussaaffigaat. Illillu naalakkersuisoqarfinni amigaateqarsimagussi, ataqqinninneq amigaatigaarsi. Oqartussaaqatigiinnitsinnut ataqqinninneq. Inatsisitsinnut ataqqinninneq. Ilitsinnut ataqqinninneq. Innuttatsinnut ataqqinninneq.
Suliffissat aningaasarsiornerlu inatsisinik inuiaalluunniit piumasaannik unioqqutitsinissamut qaquguluunniit utoqqatsissutigineqarsinnaanngillat. Aatsitassarsiorneq nunatsinni inatsisit naapertorlugit inuiaqatigiillu ataqqilluinnarlugit pissanngippat, taava aatsitassarsiortoqarnavianngilaq. Allamik ilaqqittariaqanngilaq.
Peqqissaarneq, ataqqinninneq akisussaassuseqarnerlu atorneqanngippata Nunatsinni aatsitassanik siorannguamilluunniit annissisoqassanngilaq.
Inussiarnersumik inuulluaqqusillunga,
Malene Vahl Rasmussen
Borgmesteri - Kommune Kujalleq - Kalaallit Nunaat