Sumiiffinni kulturilerisut, timersoqatigiiffiit, timersortarfiit aqutsisui aamma timersortarfinni siulersuisut siulittaasui Qaqortumi ulluni januaarip qulinganiit aqqarngat ilanngullugu isumasioqatigiisinneqarput.
Isumasioqatigiinermi timersornikkut maleruagassat isumaqatigiissutillu assigiinngitsut aamma eqqartorneqarput.
- Kommunimiit timersornikkut tapiissutit, Naalakkersuisuniit tapiissutit, siulersuisuni sulineq aamma politikki isumasioqatigiinnermi ilaatigut sammivagut, Kommune Kujallermi timersornermik, peqatigiiffilerinermik, pitsaaliuinermillu suliaqartoq Angerdla Kielsen Olsen oqarpoq.
Isumasioqatigiineq pissarsiaqarfiusoq sumiiffinni nanginneqassasoq aaliangiunneqarpoq.
- Peqataasut aaliangerput sumiiffinniit peqataasut sumiiffinnukarunik namminneerlutik naapeqqissasut, taamaalilluni una ukioq naatinnagu sumiiffinni timersornikkut ingerlataqartut sumiiffimminni naapinnissartik aaliangiuppaat. Isumasioqatigiinneq amigaatigineqartarsimasoq paasinarsivoq taamaammat peqataasunut uagutsinnullumi pissarsiaqaataalluaqaaq, Kommune Kujallermi timersornermik, peqatigiiffilerinermik, pitsaaliuinermillu suliaqartoq Angerdla Kielsen Olsen oqarpoq.
Narsamiit, Qaqortumiit Nanortalimmiillu timersoqatigiifiiniit, kulturilerisuniit, timersortarfiit siulersuisuisa siulittaasuanniit aqutsisuiniillu peqataasoqarpoq, taakua novembarip qaammataani aggersagaallutik periarfissinneqarsimapput.