Benedikte Møller Qaqortup Kommunerisimasaani 1997-imi ilinniartutut sulilersoq tallimanngornermi decembarip 12-ianni ukiuni 25-ni sulisimanera persuarsiutigineqarpoq. Qanigisaasut suleqataasullu Qaqortumi kommunip illorsuata ataatsimiittarfiani najuupput.
- Sulininni ulapissuaariarluta piffissaq nallermat inersuarmut ilaquttakka suleqatikkalu nalliuttorsiorpugut, unnukkullu aamma suleqatikkalu julefrokosterluta, ah ulloq nuanneqaaq puigunaallunilu, Benedikte Møller oqarpoq.
Benediktep suliffini ulapaarfiusoq nuannareqaa, ullaakkut erniinaq suliartortarpoq suliffiullu maleruagassai ataqqisarlugit. Ukiullu ilaanni aanaartornermik nalaattaqarsimagaluarluni tunniutiinarnani ingerlaannarpoq.
- Ullaakkut arfineq marluk qaanngilaarnerani suliartorlunga anisarpunga, arfineq pingasunooraangama qaanngiuttoortutut misigisarpunga. Qaratsakkut aanaartoorama oqalunniarnera eqqugaavoq nakorsamiillu sulileqqinnissara piffissap sivisuup iluani aatsaat pisinnaasoq oqaatigineqarpoq, sulerusukkama uteriillunga peqqissarlungalu nukittorsarpunga taamaasillunga sulileqqippunga, Benedikte Møller oqarpoq.
Benedikte ukiuni 25-ni sulisimanerani Kommune Kujallermi pisortanit qujassuteqarluni oqaaseqarfigineqarpoq.