Tusarnaartitsinerit, Santa Luciarneq, palasip saqqummiinera, timersullammannik toqqaaneq, meeqqat tusarnaartitsinerat ilaatigut decembarip 13-anni Nanortallip timersortarfiani ataatsimuualaarnermi ingerlanneqarput.
Arnat Peqatigiit aamma Klub Alummiumi isertartut sinniisai kissartutoqatigiinnermik ingerlatsisoralugit, angummik arnamillu saqqummiisulerlutik ulloq nuannersumik ataatsimoorfiusumillu ingerlavoq.
- Santa Luciartut naammassimmata qulliit suli qaminnganerini tupaallaataasumik ujaajeertoqarpoq isersimasunit nuannarineqarluartumik. Timersortartunik nersornaasiinermi, neriunaatilinnik, sungiusaasutsialannik timersullammammillu toqqaasoqarpoq, taama oqarpoq Nanortalimmi kulturimut sunngiffimmullu suliaqartoq Samuel Simonsen.
Timersortartunik nersornaasiinermi toqqagaasut ukuupput:
Neriunaatilik (nukappiaaluk niviaalullu): Uiloq Enoksen aamma Abia Abelsen Nielsen
Sungiusaasutsialak: Minik Stephensen aamma Benjamin L. Chemnitz
Timersullammak: Arnani Rosine Lange angutinilu Ari Enoksen.
Unnuk naggaserlugu inersuarmi najuuttut tamarmik Guuterput atorlugu tussiaqatigiipput, Nanortalimmi erinarsortartunik ingiorteqarlutik.