Innuttaasunik ataatsimiititsinerni ukiuni kingullerni aningaasanik aqutsinerluttoqarsimasaneranik oqariartuuteqaruma kukkusumik paasissutissiinermik oqariartuuteqarnerarneqarsinnaanngilanga. Innuttaasummi kialluunniit ukiuni kingullerni sisamani ukiumoortumik nalunaarutit kommunip nittartagaani atuarsinnaavai. Taama oqariartuuteqarneq pisuutitsiniarnerunngilaq, pissutilli qanoq inissisimaneranik takutitsinerulluni.
Kommunalbestyrelsimut oqaluuserisassatut siunnersuutigineqarsimasut ilaat, kommunalbestyrelsimi ataatsimiinnermi ilaannginnerannut pissutaavoq allattoqarfimmi sulisut akornanni aasaq sulinngiffeqartoqarnerani aammalu pisortaanerup taarserneqarnerata nalaani ingerlatitseqqiisimannginneq. Piffissami matumani allakkat isertut, suut suliarineqarsimanersut suullu arajutsineqarsimanersut sulisunit maanna misissorneqaleruttorput. Taamaattumik siunnersuutigineqartoq kommunalbestyrelsimi suliarineqarumaarnissaa nalornissutigineqassanngilaq.
Nanortallip atuarfia oqoqarmat siorna suliarineqarluni aallartinnikuuvoq, oqoqarunnaarlunilu aasaq ammaqqinnikuulluni. Atuarfitoqaq kælderimini kiassaateqarfiusoq ingutserlugu nutartigassaasoq, oqoqarmat matoorneqarnikuuvoq, oquk illorsuup sinneranut siaruaqqissinnaajunnaarlugu. Taanna kommunalbestyrelsimi aningaasaliiffigineqarsinnaalerpat suliarineqarnissaa naatsorsuutigaarput. Taamaattumik atuarfiup matoqqaneranik oqariartuuteqarneq eqqortuunngilaq, suliassallu ilisimaarivagut.
Innuttaasunut ataatsimiisitisarninni sumiiffinnut tulluarsarlunga saqqummiussaqartarpunga, sumiiffigisanni pissutsit aallaavigalugit saqqummiisarlunga. Qaqortullu mittarfittaarnissaa kommunitsinnut tamanut iluaqutaasussaasoq aamma Nanortalimmut sunniuteqarluartussaavoq. Servicekontraktillu aaqqissuuteqqinneqarnissaanut kommunitsinnut tamanut pitsaasumik iluaqutaasumillu sunniuteqarluartussamik siunnerfeqarpugut. Pingaartumik napparsimasunut nakorsiartussanut, erniartortussanullu angallannerit pitsaanerusut qulakkeerinneqataaffiginissaannut.
Qaqortup mittarfittaarnissaani Qaqortumiit Nanortalimmut aqqutit eqaannerusumik pilernissaannut Itilliarsummi aqqutip sipillugu suliarineqarnissaanut suliniut aamma tapersersorparput. Januaarimi Nanortalimmi innuttaasunut ataatsimiisitsinermi mittarfittaarnissap Nanortalimmut sunniuteqarluartussaanera saqqummiussassama ilagaat.
Innuttaasunut ataatsimiisitsinerit ilaanni Nanortalimmi atuarfiup matoqqanerata nalaanni katsorsartinnerit ingerlanneqarnissaanut sumiiffissaaleqisarsimaneq eqqaavara, tamanna innuttaasunit oqariartuutigineqarnikuummat. Isumaqanngilarli katsorsaanerit ingerlanneqartannginnerannik oqariartornermik.
Nammineerlungami pingaartippara katsorsaanerit aamma angajoqqaanngortussanut siusinaarluni iliuuseqartarnerit kommunitsinni ingerlanneqartuartarnissaat. Taamaattumik Allorfik aamma angajoqqaanngortussanut piareersarfik MANU Namminersorlutik oqartussanit akisussaaffigineqartut ingerlaannarnissaat qulakkeerusullugu Naalakkersuisunik susassaqartunik ataatsimeeqateqarnikuuvunga. Neriuutigalugu angajoqqaanngortussat katsorsarneqarnissamik pisariaqartitsisut siusissukkut iliuuseqarfigineqartarnissaat.
Ullumikkut kommunip aningaasaqarnerata inissisimanera ilungersunartumi inissisimavoq, sapingisarpullu tamaat atorlugu pitsanngorsaaniarnernik siunertaqarluta sulinerput aallartereerparput. Aningaasaqarnermi pitsaanngitsoq, sulisunik soraarsitsiortornerit kinguneri, tamakkiisumillu pisortaqanngitsumut iserneq oqitsuinnaanngilaq. Suliassaqaqigattalu kommunalbestyrelsimi suleqatigiinneq pitsaasoq pisariaqartipparput.
Malene Vahl Rasmussen