Persuarsiorfiusumik tunniussinermi Qaqortumi qinikkat ataatsimiittarfianniit meeqqat isummersorfianeersut Milan Møller, Miila Mølgaard aamma Luna Gedionsen Nanortalimmiit malinnaasoq, kiisalu borgmesteri Malene Vahl Rasmussen Naalakkersuisunik ataatsimeeqateqarnini pillugu Nuummiittoq atortorissaarutitigut Kommune Kujallermiit peqataapput.
-Meeqqat isummersorfianiit aliangersakkat tunniussasi imartuut attortissutigivakka, Kommune Kujallermimi aningaasatigut ullumikkut ilungersunartorsiorpugut, anguniakkasilu aningaasanik naleqartussaammata, iliuuseqaqataarusunnitsinni akissaqarnissaq siunertaralugu ulluni makkunani Naalakkersuisunik ataatsimeeqateqaqattaarpunga, borgmesteri Malene Vahl Rasmussen meeqqat isummersorfiinit tunniussisunut ilaatigut taama oqaaseqarpoq.
Aaliangersagaq tunniunneqartoq arfinilinnik qulequtaqartoq meeqqat sunngiffimmi ornittagaasa pitsanngorsarniissaannik, Najugarisami avatangiisit eqquluitsuunissaannik, Imigassap aalakoornartortallip toqqissisimanngitsitisarnera pillugu suliniartoqarnissaanik, Meeqqat tamarmik ikiorneqarlutik ataqqinneqarnissaannik aammalu meeqqat tusarnaarneqarnissaannik ikioqatigiittoqarnissaanillu oqariartuuteqarpoq.
-Oqaatigisinnaavara ukua anguniakkasi pimoorullugit sulissutigineqaqqikumaarneri peqataaffigissagatsigut, taamaattumik tunniussassinnut qujanarujussuaq, Malene Vahl Rasmussen oqarpoq.
Aaliangersakkamik tunniussinerup marlunngornermi novembarip 18-ianni ingerlanneqarnerani borgmesterinut tamanut Naalakkersuisumullu tunniussisoqarpoq.