Kalaallinit atisaliat meqqit assigiinngitsut, atisalluunniit nammineq mersukkat, nuersakkat atisaralugit unnussioqatigiinneq ingerlanneqarpoq.
-Kalaaliunerput malunnartinniarlugu tulluusimaarutigalugulu atisat kalaallinit meqqiliarineqarsimasut ilaatigut atisaralugit, kiinnagullu taartumi qaamasartunik inuit kakiornerannit tanillugit, kalaallit kaagiannik sutugassaqarluta Inuk Party inuusuttuaqqanit nuannisarfioqisoq unnussiorfigaarput, Panissaaq Poulsen Klub Alummiuni aqutsisuusoq oqaluttuarpoq.
Kalaaliussutsimik tulluusimaarutiginnilluni malunnartitsineq inuusuttuaqqanit nuannarineqarluarmat siunissami assingusumik aaqqissuussisoqartarnissaa pilersaarutaavoq.
-Aaqqissuussap inuusuttuaqqanit nuannarineqarluarnera malunnarpoq, kalaaliunitsinnimmi tulluusimaarutiginninnerput malunnartittarutsigut kinaassutitsinnut aamma nukittorsaataassammat taama aaqqissuussivugut. Siunissami assigiinngitsunik qulequtalerluta aaqqissuussisarnissarput siunniupparput, Panissaaq Poulsen oqarpoq.
Tallimanngornermi novembarip 14-ianni Inuk Party ingerlanneqarpoq.