Ataqqisakka tulluusimaarutigisakkalu Aalisartut Piniartullu, ullorsiornissinni qamanngavik pilluangaaritsi.
Pinngortitaq kusanangaartoq avatangiiserisarput, nunatta imartattalu pissarititaanik siulitta imminnut pilersorlutik inuuffigisaat kingornussarisarput, maanna ilissi inuussutissarsiorfigaarsi.
Qujamasuutigisarpara nerisassanik mamarnerpaanik peqqinnarluartunillu pilersorluta isumagisaratsigut. Inuiaassutitsinnimi ilisarnaatitta ilagimmatigit ullutsinni pinngitsoorsinnaanngilagut.
Nunatta pissarititaanik nunatsinneersunillu imminut pilersornissarput ilitsoqqussimasarput kinguaatsinnut taakkulu kinguaassaannut ingerlateqqinneqartuarumaartoq neriuutigaara.
Tamanna Kommune Kujallermiit suleqataaffigerusupparput. Meerartatsinnumi paaqqinnittarfinni, utoqqaallu illuini nerisaqarnerat eqqarsaatigalu kalaaliminernik nerisaqartitsinerunissaq suliniutigalugu maanna misissuinerit aallartereerpagut, matumani suleqatigiilluarnissatsinnik isumalluarfigaassi.
Inuussutissarsiutersi ukiup ilaani oqitsuinnaaneq ajortoq ilisamavara, ulloqartarpormi silap pinngortitallu killiliisarnerani uninngaffigisariaqartakkassinik. Pinngortitarsuarmi sapiillusi inuussutissarsiutersi ingerlatarsi ataqqinaatigaarsi.
Ilaqarpusi ajunaarnikkut allatigulluunniit ajutoornikkut akornatsinniikkunnaarsimasunik, taakku aamma ullorsiornissinni eqqaamassavagut, taakkumi ilissitullu inuussutissarsiuteqarsimanerat ilissi aqqutigalusi kinguaatsinnut ingerlateqqinneqarumaarpoq.
Ataqqinartut Piniartut Aalisartullu tulluusimaarutikka, siunissami ajunngitsunik tamanik kissaallusi ullorsiornissinni pilluaqqoqqippassi, pilluaqqussutiga inooqatigisassinnut/aappassinnut ingerlateqqissavarsi, ulluinnarnermi tapersersorteqarneq isumaqaqaaq.
Ullorsiorluarnissassinnik kissaallusi,
Malene Vahl Rasmussen
Kommune Kujallermi borgmesteri.