Sisamanngornermi oktobarip aappaani Tasersuup Atuarfiani atuartut anitsiartarfimmi katersuussimasut, pinnguartarfiit nammineq kajumissutsimik suliniutaasut atoqqaarfissiorneqarput.
-Nammineq kajumissutsiminnik suliaqartut suliaannut annertuumut qujarusuppunga, pinnguartarfittaarmi atuartunut iluaqutaassaaq, anitsiarnermimi sammisassat amerlipput ataatsimoorfiulluarumaarporlu, Ida Jeremiassen Tasersuup Atuarfiani pisortaasoq atoqqaarfissiortitsinermi ilaatigut taama oqarpoq.
Pinnguartarfik atoqqaarfissiorneqartoq KJ-mi sulisunit aamma nammineq kajumissutsiminnik suliaqartut suleqataaffigisaannik ikkussuunneqarpoq.
-Kommune Kujalleq ilaqutariinnut meerartatsinnullu nuannersuussappat tamatta akisussaaqataavugut. Nammineq kajumissutitsinnik suliaqarnitsigut neriuppugut allat aamma nammineq kajumissutsimik suliaqarusulernissaannut ikitseqataalluta. Nammineq kajumissutsimik suleqataasunut aningaasaliisunullu tamanut qujarusuppunga, Kuluk Sinclair-Stöm nammineq kajumissutsiminik suliniuteqartoq oqalugiarnermini taama oqariartuuteqarpoq.
Pinnguartarfiup atoqqaarfissiorneqartup ikkussuunnerata sanitigut eqaarsaartarfimmi qallortarfik aamma ikkussuunneqarpoq, anitsiartarfimmilu måliliisoqarluni.
-Atuarfiup nutaamik pinnguartarfittaarnerani pilluaqqorusuppara, Kommunilu sinnerlugu nammineq kajumissutsiminnik suliaqartunut aningaasaliisunullu tamanut qujangaarlunga. Neriuppunga pinnguartarfittaaq paarilluarneqarumaartoq, borgmesteri Malene Vahl Rasmussen qujamasulluni atoqqarfissiortitsinermi katersuussimasunut taama oqarpoq.
Pinnguartarfittaamut aningaasaliisut tassaapput:
60° North, Paarisa, Hotel Qaqortoq aamma Arctic Café, Stark Qaqortoq, HK Transport aamma Grønlandsbanken. Pinnguartarfiup assartuunneqarneranut Royal Arctic Line tunissuteqarpoq, KJ-lu ikkussuisuulluni.
Atoqqaarfissiortitsinermi Brugseni aamma Pisiffik sutugassaqartitsinermut tunissuteqarput.