Kingullermik ullut 14-imorsiallit qaammammusiallillu akissarsineranni, kiisalu akileraarutinik utertoortoqarnerani ajornartorsiutit malugilluarpavut. Ulluni taama ittuni sulinngitsoortut ajoraluartumik amerlisarput, taamalu suliffeqarfinnik ingerlatsineq innuttaasunillu sullissineq sunnerneqartarlutik.
Imigassamik ikiaroorniutinillu pissuteqartumik sulinngitsoortarnerit inuppassuarnut sunniuttarput. Sunniutaali sanngiinnerpaanit annertunerpaamik malugineqartarput: utoqqaat pisariaqartitaraluaminnik paarineeruttarput, meeqqallu paaqqinnittarfinnut atuarfinnullu takkuttut ilaanni inersimasimasunik naammattumik amerlassusilinnit tigusisussaqarneq ajorput. Pissutsit taama ittut kommunitut akueriinnarsinnaanngilavut.
Taamaammat imigassamik ikiaroornartunillu ajornartorsiutit toqqarlugit qanoq iliuuseqarfiginiarlugit kommunalbestyrelsi aalajangerpoq, imaaliorniarpugut;
· Ajornartorsiutip innuttaasunut suliffeqarfiillu ingerlanerinut sunniutai ammasumik saqqummiuttarniarpavut.
· Angajoqqaanik, sulisunik inuiaqatigiinnilu suliniartunik peqateqarluni pinaveersaartitsineq nukittorsarneqassaaq.
· Innuttaasut sulisullu pinngitsuusinnaajunnaarsimasut pitsaanerusumik tapersersorneqarnissaannik ikiorneqarnissaannillu neqeroorfigineqassapput.
· Kommunimi inunnik sullissiviit tamarmik aalaakaasunik toqqissisimanartunillu atugaqarfiunissaat sulissutigissavarput - taamaalillutik meeqqat, utoqqaat kikkullu allat pisariaqartitsisut ikiorneqarlutillu isumassorneqarsinnaaniassammata.
Tamatumalu peqatigisaanik sulisut ullut tamaasa aalajaallutik suliartortartut suliffiullu ingerlanissaannik qularnaarinnittartut kommunalbestyrelsip qutsavigerujussuarniarpai. Nalilerneqarsinnaanngitsumik sulivusi, Kommune Kujalliup peqqinnerulernissaanik nukittunerulernissaanillu sulinermi peqatigissavaasi.
-Suliffigissaanngikkutta aamma sulisut ilaasa imigassamik aqutsisinnaannginnerannik ajornartorsiuteqarnerput pillugu iliuuseqanngikkutta sullisinerput pitsanngornavianngilaq. Ajornartorsiullu tamanna inuiaqatigiittut ataatsimoorluta suliassaraarput, qinikkatummi ilungersuutigalugu eqqumaffigaarput, kisimiillutali aaqqissinnaanngilarput. Ajornerpaaffiani imigassamik matusigallarnissaq tikissinnaavarput, misissuititsinerli naammasseriarpat alloriaqqikkumaarpugut, Malene Vahl Rasmussen kommunalbestyrelsi sinnerlugu oqarpoq.