Partners, Sequence, skak nallukattallu atorlugit pinnguaatersorneq, ilaatigullu guitarimik appisimaallattaarneq pingasunngornermi septembarip 24-anni Nanortalimmi inersimasunut unnussiuaartitsinermi nuannisarfiulluarput.
-Inersimasunut imigassartaqanngitsumik ataatsimoorfiusinnaasut amigaatigineqarmata misiliummik aaqqissuussinerput tigulluarneqartoq nuannaarutigeqaara. Februaarip qaammataa ilanngullugu taamatut unnussiuaartitsisarnissarput qaammatikkaartumik ingerlatissallugu siunniunnikuuarput, neriuppunga atorluarneqarumaartoq, Kommune Kujallermi Nanortalimmi kulturimi sunngiffimilu sulisoq Panissaaq Poulsen oqaluttuarpoq.
Nanortalimmi Katersortafik suliniummut tapersersuilluni akeqanngitsumik Katersortarfiup atorneqarnissaanut tapersersuivoq, taamatullu borgmesteri Malene Vahl Rasmussen suliniummut kusanartumut tapersiilluni qujamasuppoq.
-Qujamasunnarpoq sulisut pikkorissut suliamut siunertagissaartumut minnerunngitsumillu meerartatsinnut maligassiuisumut aaqqissuussaqarlutik suliniuteqarnerat, qanortoq taama aaqqissuussineq illoqarfitsinni nunaqarfitsinnilu malitseqartinneqarili. Katersortarfiup tapersersuilluni akeqanngitsumik attartortitsineranut attartortitsisarnissaanullu aamma qutsavigingaarapara, borgmesteri Malene Vahl Rasmussen oqarpoq.
Imigassartaqanngitsumik unnussiaarnissap tullia oktobarip 15-ianni Katersortarfimmi ingerlanneqaassaaq.