Saqqaarsummut qaqilluni unammisitsineq juulip aallaqqaataaniit 27-iat ilanngullugu ingerlanneqarmat hashtag #Silamiitta allallugu Facebookimut saqqummiisimasut 38-upput.
-Unammisitsinerup siunertarivaa innuttaasut timiminnik aalatitsillutik silami nuannersumik misigisaqarnissaat, taamaattumik peqataasoqarluarnera nuannaarutigaara peqataasullu tamaasa qutsavigalugit, Pitsaaliuinermi immikkoortortaqarfimmiit unammisitsinermut aaqqissuisuusoq Laila Motzfeldt oqarpoq.
Peqataasut akornannit makitaasut sisamat, Sermeq helicoptersimiit helikopterimik angalaarlutik takornariartinneqassapput.
-Peqataasut akornannit sisamat makitaasimanerat pillugu nalunaarfigineqarput, taakku Sermeq Helicoptersimut ilaallutik Qaqortup eqqaani angalasussanngorput. Unammisitsinermi matumani Sermeq Helicoptersip taamatut pinnatassaqartitilluni tapersersuineranut qutsavigingaarpara, neriuppungalu makitaasut migisisaqarluarumaartut, Laila Motzfeldt oqarpoq.
Makinneqartut sisamat tassaapput Josva Semionsen, Kuuna Inûsugtok, Simigaq Else-Marie Johansen aamma Rosa Olsen.