Arfininngornermi apriilip 26-anni peqatigiiffilerinermik pikkorissarnermut Qaqortormiut arlallit peqataapput, matumanilu qulequttat Peqatigiiffilerineq, Qinnuteqariaatsit/Qinnuteqarfissat, Pilersaarusiorneq anguniagaqarnerlu, kiisalu Illoqarfik nunaqarfiillu uummaarissut pikkorissaassutaapput.
-Pikkorissarnermi peqataasut ualeq naallugu eqimattanngorlutik suliaqarput, eqimattat tamarmik immikkut sammisaqarput. Tamarmillu anguniagassaminnik siunniussaqarlutik, Kommune Kujallermi suliniummut aqutsisoq, Bolethe Stenskov oqarpoq.
Eqimattani pingasuusuni qulequttat assigiinngitsut qulequtarineqartut pikkorissarnermut peqataasunit piviusunngortinniarneqassapput.
-Eqimattani pingasuusuni qulequtarineqartut tassaapput, Innarluutillit Qaqortumiittut aasaanerani angalaartinneqarnissaanik suliniut, Kommunip nittartagaani peqatigiiffiit pillugit paasissutissanik immersuinissamut isumasioqatigiinnissaaq, kiisalu Qaqortup 250-liinneranut atatillugu kulturugip nalaani Qaqortumi timersornikkut peqatigiiffiit meeqqanut timersuutinik misileraatitsinissaat pillugu suliniut. Suliniutit taakku eqimattani eqqartorneqartut, eqimattani piviusunngortinniarlugit suliniutigineqassapput, Bolethe Stenskov oqaluttuarpoq.
Qaqortumi pikkorissaanerup ingerlanneqartup assinganik Narsami maajip pingajuanni aamma Nanortalimmi maajip qulinganni pikkorissaasoqassaaq.