Eqqaassutissaliinissamut ilaqutaasut sinnerlugut Ellen Simonsen nammineq kajumissutimik suliaqarluni aningaasaliisussarsiorsimavoq, eqqaassutissarlu Qaqortup illoqarfiata qeqqani inissisimaffeqassaaq.
-Nuannaarutigaara ittuma ujaqqerisup Hans Kielsenip eqqaassutissalerneqarnissaa piviusunngortussanngormat, Ellen Simonsen oqarpoq.
Hans Kielsen “Hansersu” ujaqqerisoq angutaasimavoq sullarissoq. Suliaasalu annertuut ilagaat Qaqortumi kalaalimineerniarfiup eqqaaniit qummut kuuk sinerlugu ujaraannarnik sissiugaq kusanarluinnartoq.
-Ittora nammineerlunga naapissimanngisaannarpara, animali Jens Kielsenip angumerigamiuk meeraanermini sulliviani ilagisarsimavaa. Oqaluttuarisarpaa qanoq sulisartiginera, assaanilu maannininissimasuni qanoq sulitiginerata takussutissaqartarnera, Ellen Simonsen oqaluttuarpoq.
Ujaqqerisup Hans Kielsenip suleqateqarluni sissami ujaqqat suliarisani nipituuliuutiginagit nipaalluni inooqataasimavoq, suliarlu kusanarluinnartoq Qaqortup illoqarfiani suli takussaavoq.
-Ittutta ujaqqerisup kusarnarluinnartumik suliaqarsimanini nipituuliuutigisarsimanngilaa, taamaattumik inissaminiilluinnarpoq suliaq kusanartoq pillugu eqqaassutissalerneqarnissaa. Ujaqqammi kippariffaarissut qaleriiaarlutik inissisimasut suli illoqarfitta kusassaatigai, neriuppungalu ukiorpassuarni paarilluarneqarlutik eriagineqarumaartut, Ellen Simonsen oqarpoq.
Hans Kielsenip eqqaassutissaa apriilip arfineq aappaani Qaqortup illoqarfiata 250-nngortorsiorluni nalliuttorsiornerani, illoqarfiup qeqqani ullup qeqqa sioqqullugu uleerneqassaaq.
Assimi takuneqarsinnaapput Hans Kielsen, nulia, ernutaallu Jens Kielsen.