Kommune maanna ukiup sisamararterutaanut nalunaarusiamik Naalakkersuisunut nassiusseqqammerpoq.
2025-mut missingersuut akuerisaq ingerlatsineq sanaartornerlu ilanngullugit ukiumut 15 mio. koruuninik sinneqartooruteqarnissamik naatsorsuuteqarnermik takutitsivoq. 2025-mi marsip 31-annit naatsorsuutini kisitsisit atuinermilu paasissutissat tunngavigalugit missingiunneqarpoq ukiumut inernerit 12-17 mio. koruunit missaanniissasut Missingiut suli nalorninarsinnaavoq maanna ukiup aallartinneraniinnerput pissutigalugu, kisianni tamakkiisumik isigalugu kommunip missingersuutitigut sinaakkutit iluanniiginnarnissaa naatsorsuutigineqarpoq, ukiumullu naatsorsuutit inerneri pitsaasuullutik.
Aningaasartuutinut naleqqussaasoqarnerata malitsigisaanik qaammatini kingullerni kommunip soraarsitsinerit ingerlateqqissimavai. Suliniutit taakku akissarsianut aningaasartuutit appariarnerannik sunniuteqartitsereerput. Soraarsitsinernut atatillugu soraarsitaanissamik ilimasaarisoqartarmat 2025-p affaani akissarsiat sipaarutigineqarnerat tamakkiisumik malunniuteqalernissaat naatsorsuutigineqarpoq.
Atuisarneq ilorraap tungaanut ineriartorpoq, pingaarnertut aningaarsartuutinut allanut aammalu sulisoqarnermut tunngasunut aningaasartuutit appariarsimallutik.
Kukkusumik nalunaarsuinerit annikilleriarsimapput, tamaakkaluartorli tamanna suli ajornartorsiutigineqartarmat aaqqiiviginiarneqaqqissaaq.
2024-mut naatsorsuutit suliarineqarput naatsorsuuserisumullu maajip aallartinnerani tunniunneqarnissamut piariissapput.
Borgmesteri Stine Egede ima oqarpoq: "Kommunalbestyrelse neriorsorsimavara ukiup sisamararterutaani aningaasatigut inissisimanermut tunngatillugu killiffimmik paasititsissallunga, qineqqusaarnermilu kommunip aningaasaqarnera assut initusimavoq. Kommunalbestyrelsip suliniutiginiassallugit aalajangiussimasai kommunalbestyrelsissamut pitsaasumik tunngavissiisimasut ilaatigullu tamakkiisumik aningaasaqarnermut isiginnilluarsinnaatitsisimammata isumannarluartumillu nangitsisinnaassammata nuannaarutigaara”.