Upernarpoq timersuutillu amerlasuut ungasinngitsukkut uneralerumaarput. B-1443-mi meeqqat ukiup ilaa timersorfiusoq nuannersorpassuarnik misigisaqarfigalugu atorluavippaat.
- Meeqqat illoqarfinni pissartanngorniunnernut, nunap immikkoortuini pissartanngorniunnernut, Kujataa Cupimut kiisalu Nunatsinni pissartanngorniunnernut misigisaqarfigilluakkaminnik peqataasarput. Taamaammat timersoqatigiiffinnut nammineq kajumissutsimik ingerlanneqartunut assigiinngitsunut qujangaarpugut illoqarfiup meerartaanut inuusuttaannullu suliarujussuat pillugu, angerlarsimaffimmi B-1443-mi pisortaq Mogens Modeweg-Hansen oqarpoq.
Meeqqat timersuutinut assigiinngitsunut peqataaffigisimanni ujamminnassimapput, ilaatigut qallornermi, assammik arsarnermi, sulorarnermi isikkamillu arsaannermi. Ilami aamma ilaat badmintonimi nunatsinni pissartanngorpoq.
- Meeqqat ajorsarnernik, aammali ajugaanernik misigisaqartarput. Ujamerpassuit meeqqat angerlaassaat tulluusimaarluta qimerloorsinnaavavut. Qallornermi kuulti siilvilu, assammik arsarluni nunatsinni pissartanngorniunnermi bronze, kiisalu nunatsinni sulorarnermi siilvi kuultilu kiisalu sulorarnermi nunatsinni pissartaq, taavalu isikkamik arsaannermi arlalinnik ujaminnattoqarsimavoq. Allanittaaq sammisaqartitsisoqartarpoq meeqqanut allatigut eqeersaataasunik, soorlu atuakkanik atorniartarfimmi skakkertarneq assorsuaq nuannarineqartarpoq, Mogens Modeweg-Hansen oqaluttuarpoq.
Ataatsimoorneq sunngiffimmilu sammisassarissaarneq B-1443-mi pingaartinneqarpoq. Aasamut håndboldskole neriuutigineqartutullu Danmarkimi Dana Cupip peqataaffiginissaat qilanaarineqarput.
- Peqatigiiffinni assigiinngitsuni meeqqat inunnik allanik peqateqarnissamut periarfissaqarluarnerat kiisalu sunngiffimmik peqqinnartumik atuinissamut periarfissaqarluarnerat meeqqanut inuusuttuaqqanullu pingaarutilerujussuuvoq. Tamakku B-1443-mi assorsuaq qujamasuutigaavut. Maanna aasamut pisussarpassuit qilanaaraavut. Ilisimalereerparput atuanngiffimmi sapaatit akunneranni håndboldskole ingerlanneqassasoq, aamma Danmarkimi Dana cupimi arsaqataanissarput neriuutigaarput, taannami 2024-mi meeqqat misigisaqarfigilluarsimavaat, Mogens Modeweg-Hansen naggasiivoq.