Sten Lundip 1961-mi inuusup marsip aallaqqaataani napparsimalluni toqukkut qimagunnerani Kommune Kujallermi suleqatitsialammik annaasaqarpugut.
Sten angutaavoq nunamut tunngasoq, nipilersornermik nuannarisalik nipilersullaqqissorlu, nunat assigiinngitsut akornanni inuiaqatigiit politikkilu pillugit isummersullaqqissoq, ilisimasaminik ingerlateqqikkusuttoq, suleqatikkuminartorlu.
Angutip ukiorpassuiarni inuiaqatigiinni sullisseqataasimasup Grønlandsfly-simasumi kingusinnerusukkut Air Greenlandinngortumi sulinini aallartissimavaa, matumani 1984-imiit 1996 tikillugu sulinermini ilaatigut trafikassistentitut, nakkutilliilluni ataqatigiissaarisutut, mittarfimmilu aqutsisutut sulisimalluni.
1996-mi Ilisimatusarfimmi Cand.scient.adm.-itut ilisimatusarnini aallartippaa, ilinniarnerminullu atatillugu Aalborgip Universitetiani ukiumi ataatsimi aamma ilinniartuusimalluni.
Kattuffinni assigiinngitsuni suleqataasarsimavoq, soorlu kalaallit Damarkimi ilinniagaqartut kattuaffiat Avalak aamma pilersitseqataaffigisimagaa.
Tele Greenlandimi ullumikkut Tusass-iusumi HR-imi supervisoritut konsulentitullu atorfeqarsimavoq, kingornalu Namminersorlutik Oqartussani ilisisimatusarnermut ataqatigiissaarisutut sulereerluni 2022-mi illoqarfimmut inunngorfigisaminut peroriartorfigisimasaminullu angerlarpoq; matumanilu Kommune Kujallermi Inuussutissarsiornermut allatsitut sulilerluni.
Stenip toqukkut qimagunnerani ilisarimannittuusugut nunaqqataasugullu maqaasissavarput, ilaqutaalu qimagaasut, pania ernutaa, qatanngutai qanigisaalu annaasaqarneranni qamanngavik misiginneqatigingaarpakka.
Sten Lundip eqqaaneqarnera ataqqinartuuli.
Kommunalbestyrelsi sinnerlugu,
Stine Egede, borgmesteri.