Nanortalimmi Alummiuni sulisut, pitsaaliuinermi siunnersortit aamma nammineq kajumissutsiminnik ikiuuttut arfininngornermi marsip 22-anni Alummiuni tamanut ammasumik unnussiuaartitsipput.
-Qiimmassaqatigiilluni unnussioqatigiinneq assigiinngitsunik saammisaqaqatigiiffiulluni meeqaniit utoqqarnut nuannisarfiuvoq, Nanortalimmi pitsaaliuisut sinnerlugit Sikkerninnguaq Petrussen oqarpoq.
Unnussioqatigiinniissamut innuttaasut namminerisaminnik kaagiliorrannikuupput, kaagerpassuillu aggiunneqartut unnussiuaaqatigiinnermi sutuutigineqarput.
-Qaammat februaari marsilu nunaqqatitsinnik inuunerminnik kipititsisoqarnikuuvoq, ataatsimoorlutalu qiimmassaqatigiinnissarput pisariaqarmat taamatut unnussiuaartitsinissamut aaqqissuivugut. Alummiuni sulisut aaqqissueqatigisagut sinnerlugit kajumissutsiminnik ikiiuuttut unnummilu peqataasut tamaasa qutsavigaagut, Sikkerninnguaq Petrussen qujamasulluni oqarpoq.
Qiimmassaqatigiilluni unnussioqatigiinnermut atatillugu Peqatigiiffik Kalaallit Meerartaat aningaasaliissuteqarput.