Atuarfiup silaannalunnerujussua oqoqarsinnaaneralu pillugu decembarip qaammataani akerliussutsimik takutitsisoqarpoq, januaarillu 29-at aallarnerfigalugu Nanortallip Atuarfiani atuartut atuarfiup avataani sumiiffinni assigiinngitsuni atuartinneqartarnerat pillugu atuartut angajoqqaavi susassaqartullu allat marsip 12-ianni Nanortalimmi angalaaqatigiillutik akerliussutsimik takutitseqqipput.
-Atuarfiup silaannalunnerujussua tipeqarneralu aaqqiiviginiarlugu Avatangiisinut Ingerlativimmiit suliariumannittussanik ujaasisoqarpoq, suliariumannittussarsiuussinerlu marsip 13-ianni killeqartinneqarmat neriuppunga suliarinnittussarsisoqarsimassasoq, Kommune Kujallermi Atuafiit pillugit sulianut aqutsisoq, Magdaline Geraae nassuiaavoq.
Atuarfiup silaataani qisuit, oqorsaatit anorimillu illersuutit taarsersugassat suliarineqassapput, imermik isaaffiit kuserfiillu iluarsarneqassapput, igalaat matusinnaanngitsut iluarsineqassapput, silaannarissarfiit salinneqarlutillu iluarsaanneqassapput kiisalu kuuffiit tipitsitsisut misissorneqarlutik iluarsineqassallutik.
- Atuarfimmi atuisut tamarmik peqqinnissaat pillugu atuarfiup januaarimiit matugallarneqarneraniit, atuartuutigut illoqarfitsinni aggulullutik atuartinneqartalerput. Qujanarporlu suliffeqarfiit, angajoqqaat susassaqartullu allat paasinillutik aaqqiigasuarnermi suleqataanerat. Tamannali pillugu akerliussutsimik takutitsisut aamma paasisinnaavakka, aaqqiissuteqarniarlunilu sulineq ingerlanneqarnerani paasinnillutik suleqataanerannut qutsavigingaarlugit, Magdaline Geraae oqarpoq.
Pingasunngornermi marsip 12-ianni Nanortalimmi akerliussutsimik takutitsisut suliniutaasut pillugit borgmesterip tullersortaanit Pipaluk Jakobsen Larsenimit oqalugiarfineqarput.