Borgmester Stine Egede ima oqarpoq:
”Nuannaarutigaara aningaaserivimmiit 75 mio. koruuninik taarsigassarsinitsigut akileraarutinut Namminersorlutillu Oqartussanut akiitsorilikkavut akilersimaleratsigit. 2023-mut naatsorsuutit ulluni qaninnerni oqaluuserereerutsigit naammassineqanngitsunut tunngasut inaarsinnaanngussavavut. Kingoraarsisussatta kommunip aningaasaqarnerata qanoq innera eqqortumik paasisimalluarsinnaalissammassuk oqiliallaatigaara.
Borgmester Stine Egede kommunalbestyrelsimut qujassuteqarnerminissaaq ima oqarpoq:
”Kommunalbestyrelsimi suleqatikka qutsavigaakka partiimut sorlermut atanerput apeqqutaatinnagu aningaasaqarnikkut iliuusissatsinnik isumaqatigiissinnaasaratta. Qinigaaffimmi matumani sorpassuit anguavut, sulili suliassarpassuaqarpugut. Aningaasaqarnermik suliaqartortavut qutsavigaakka ilungersornermikkut aningaasaqarnerput ilorraap tungaanut aallartissinnaasimammassuk, sulisuvullu tamaasa killiffitsinnut matumunnga qutsavigaakka."
2025-mi apriilip aallaqqaataani kommunalbestyrelsimut qinersisoqassaaq.