Ilinniartitsisoq soraarninngortoq Oline Andreassen ilinniartitsisutut sulilernissani sioqqullugu meeqqerivinni sulisarsimavoq, 1994-imiillu atualerlaanut ilinniartitsisutut sulisimalluni.
-Ukiorpassuarni sulininni atuartorpassuit meeqqerivimmiit atuartuunermut ikaarsaartut ilinniartittarsimavatit. Matumani atuartuunissaannut aamma allassinnaalernissaannut atuarsinnaalernissaannullu tunngaviliilluarsimallutit, Nanortallip Atuarfiata pisortaa Kunuk Simonsen soraarninngortumut qujassuteqarluni oqaaseqarnermini ilaatigut taama oqarpoq.
Oline Andreassen pisortatigoortumik martsip naanerani soraarninngortussaavoq, soraarninngunnginnerminili sulinngiffeqartussaanera pillugu februaarip 21-anni persuarsiorpalaartumik soraarninngornera malunnartinneqarpoq.
- Atuarfik sinnerlugu tamanut qutsavigingaarpakkit, siunissamilu ajunnginnerpaamik ilaquttatillu kissaallusi, Kunuk Simonsen qujassuteqarluni taama naggasiivoq.