Marlunngornermi januaarip 28-ianni Timersoqatigiiffiit Kattuffiat Qaqortumi suliaqartitsinermut aggersaavoq.
Qaqortumi timersornermik suliallit suliaqartitsinermi tassani meeqqanut tunngasunik pikkorissarneqarnerminni piginnaasaminnik pitsanngorsaapput.
Suliaqartitsinermi matumani meeqqat inuunerinnissaat aammalu timersoqatigiiffinni assigiingitsuni meeqqat tikilluaqqusaasutut misiginissaat sammineqarpoq.
Ima ingerlanneqarpoq
Sulianik ingerlatsisut tassaasut timersoqatigiiffinni ilaasortat, sungiusaasut, aqutsisut timersoqatigiiffinnullu assigiinngitsunut soqutiginnittut suliaqartitsinermut peqataaqqullugit qaaqqunneqarsimapput. Peqataasut ilaat tassaavoq Kommune Kujallermi timersornermut peqatigiiffilerinermullu siunnersorti, Bolethe Stenskov.
-Peqataanera iluaraara, aamma maani peqatigiiffilerisuni taamatut pikkorissaqataanissaq pisariaqartipparput, eqqaasitseqqippoq meerartagut qanoq pingaartiginersut aamma qanoq paaritigissanerigut, Bolethe Stenskov oqaluttuarpoq.
Peqataasut ilaatigut Timersoqatigiiffiit Kattuffiata misissuineranut ilaatinneqassapput aammalu meeqqanut isiginnittaaseq eqqarsaatigalugu suliniutinut peqataatinneqassallutik. Tassunga ilaapput meeqqat qanoq ittunik inuttut piginnaatittaaffeqarnersut aammalu inersimasut meeqqanullu akisussaasut timersornermi meeqqanik sullississagaangamik qanoq suleriaaseqassanersut.
Ineriartortoqalerpoq
Timersoqatigiiffiit Kattuffiata aamma Kommune Kujalliup nutaamik isumaqatigiissusiornerata kingorna illuatungeriit tamarmik Kujataani timersornermik ingerlatallit assigiinngitsut nukittorsarniarlugit pilersaaruteqarput.
-Workshopertitsineq isumaqarpunga sunniuteqarluassasoq, sungiusaasut peqatigiiffilerisut meeqqanillu suliaqartut eqqummaarinnerulissapput meeqqat pisinnaatitaaffiinut pisariaqartitaannullu, aamma meeqqat illersorneqarnissaat qanoq pingaaruteqartiginersoq pillugu eqqummaarinnerulissallutik, Bolethe Stenskov oqaluttuarpoq.
Aasap ingerlanerani workshopi alla ”Ataatsimoorluta Aalasa” ingerlanneqassaaq. Taanna juunip qaammataani pissaaq, tassani Kujataani timersornermut attuumassuteqartut tamarmik aggersarneqassapput.
-Maannakkut Qaqortumiipput, taava Nanortalik Narsarlu aamma tikikkumaarpaat. Workshopertitsisarnerit ingerlaavaartumik ingerlanneqartarnissaat nammineq kajumissutsimik suliaqartartut kissaatigivaat, ilitsersuisussanimmi ineriartortitserusuttorujussuupput, neriuppunga aamma taanna anguneqarumaartoq, Bolethe Stenskov oqarpoq.
Suliaqartitsinermik ingerlatsisoqartussanngorpat qaaqqusisoqarumaarpoq, soqutiginnittullu suliaqartitsinermut siullermut peqataasimanngikkaluarunilluunniit peqataanissamut tikilluaqqusaapput.