Nanortalimmi pitsaaliuinermik suliaqartut aamma Klub Alummiuni sulisut suleqatigiillutik, klubbimi unnuiffigineqarsinnaasumik januaarip 31-anni film marathonertitsipput. Aaqqissuussarlu tamanna inuusuttunit peqataaffigineqarluarpoq.
-Unnuup ingerlanerani filmit pingasut isiginnaarneqarput, unnuallu ingerlanerani aamma toqqortaannermik pinnguarfiuvoq. Inuusuttuaqqat inuusuttullu 21-t tikillugit ukiullit unnummi aaqqissuussami nuannisaqaat. Aaqqissuussaq klubbimi unnuiffigineqarsinnaasoq ullaap tungaanut ingerlanneqarpoq, ullaarlu ullaakkorsioqatigiinnermik torersaanermillu naggasiiffiuvoq, Sikkerninnguaq Petrussen Nanortalimmi pitsaaliuinermik suliaqartoq oqaluttuarpoq.
Film marathonertitsinermi Nanortallip Timersortarfianiit madrassit 37-t unnuiffissatut atorneqarput.