Tasersuup Atuarfiani 10.klassimi atuartut 33-t januaarip qaammataani misilitsissutissaminnik suliaqareerlutik februarip aallartissimalernerani misilitsipput, taakkunanngalu atuartut 14-it A-mik karakterilerneqarlutik angusarissaarput.
-Nuannaarutigaarput ukioq manna atuartut projekteqarlutik suliaminnik misilitsinnerminni angusarissaarnerat. Atuartut 14-it A-mik karakterilerneqarput, atuartoq ataaseq B-mik karakterilerneqarpoq, C-mik karakterilerneqartut sisamat, kiisalu D-mik E-millu karakterilerneqartut arfiniliullutik. Atuartunit 33-usunit atuartut sisamat takkutinngitsoorput, Tasersuup Atuarfiani atuarfiup pisortaata tullersortaa Karlina Lundblad oqarpoq.
Tasersuup Atuarfiani specialklassimi atuartut pingasut tallimanngornermi februaarip 21-anni misilitsisutissatut suliartik inaarutaasumik misilitsissutigissavaat.
10. klassimi atuartut tamarmik allattariarsornermi oqaluttariarsornermilu soraarummiissutigalugu maajimi juunimilu misilitseqqissapput.