Sisamanngornermi januaarip arfineq-sisamaanni nalliuttorsiornissamut suleqatigiissitat isumasioqatigiisitsipput. Tassani isumassarsioqatigiillutik Qaqortup apriilip arfineq-aappaanni 2025-mi qanoq nalliussineqarnissaanik eqqartueqatigiillutik.
-Nalliuttorsiorneq una Qaqortup innuttaasuinut kissaataannullu aallaaveqassaaq, taama nalliuttorsiornissamut suleqatigiissitat siulittaasuat Kiiu Olsen oqarpoq.
Qaqortup 250-iliinissaanut nalliuttorsiornissamut aningaasat 1 mio. koruunit immikkoortinneqarput. Tamanna kommunalbestyrelsip 2024-mi novembarimi aalajangiuppaa. Aningaasarpassuit 2025-mi apriilip arfineq-aappaanniit ukiup sinneranut atussapput.
Ima ingerlanneqarpoq
Campus Kujalliup inersuaani peqataasut eqimattakkaarlutik issiaqatigiipput ukiup ingerlanerani qanoq pisoqarnissaanut kissaatitik tusartillugillu eqqartorlugit.
Tamatuma kingorna nalliuttorsiornissamut suleqatigiissitanut peqataasut isummatik kissaatitillu saqqummiuppaat.
Taakkartorneqartut ilagaat maratonerluni arpanneq, umiarsualivimmi pikialaartitsineq (havnefest), eqqumiitsulianik saqqummiineq, silami nerisassiorneq, kalaallisuunik assuarluni eqqaaniaaneq ilaatigut Anders Olsen eqqaaniarlugu.
Kinaluunniit inissaqassaaq
Nalliuttorsiornissamut suleqatigiissitat peqataajumasunut allanut mattussinngillat.
-Qaqortumiittunut tamanut isumasioqatigiisitseqqikkumaarpugut isummersuutigut nangittumik samminiassagatsigit,, Kiiu Olsen oqarpoq
Suliat aallartereeraluartut Qaqortumi innuttaasut tamarmik Qaqortup 250-iliilluni nalliuttorsiutiginissaanut suliaqarnermut peqataanissaminnik tikilluaqqusaapput. Isumasioqatigiinnissap tullia februaarimi pissaaq. Kommune Kujalliup nittartagaatigut nutaamik qaaqqussutiliortoqassaaq.