-Najugaqartut nammineerlutik isumassarsiaat piviusunngortinneqartoq takullugu sulisuulluni tulluusimaarnaqaaq, nerersuaaqatigiinnerminni nuannisarluaramik ukiut tamaasa taamatut aaqqissuussisinnaanissartik neriuutigaat, Dorthe Semsen Johansen, Nanortalimmi utoqqaat illuanni aqutsisuusoq oqaluttuarpoq.
Utoqqaat najugaqartut isumassarsiartik piviusunngortikkusullugu Brugsenimut nerisassanik qinnuteqarsimapput, taamaalillutillu rullesteginik, naatsiianik, gulerodinillu tunissuteqarfigineqarlutik.
-Brugsenimiit nerisassat pissarsiarineqartut saniatigut najugaqartut sulisullu nammineq kaasarfimmiuminnik tapiissuteqarlutik aningaasanik katersineranni kinguleqqiutit imeruersaatillu isumagineqarput, Dorthe Semsen johansen oqarpoq.
Kunngit pingasut ulluanni nereqatigiinnermi angerlarsimaffeqanngitsut arfineq pingasut, kiisalu utoqqaq illoqarfimmi najugalik kiserliortoq nereqatigiinnermi peqataapput.