Ukiumut naatsorsuutit inernerini amigartoorutaasut 32,5 mio. koruuniupput naak missingersuusiornermi 25,1 mio. koruuninik amigartooruteqarnissaq naatsorsuutigineqarsimagaluartoq.
Amigartoorutissatut missingersuutaasimasunut kommunip inissiaatileqatigiiffiutigisimasaa Kujallermi Illuutini inissiani 22-nik pisineq ilaavoq.
Tassalu 2022-imi missingersuusianut sanilliullugu ingerlatsinermut 7,4 mio koruuninik sippuisoqarsimavoq.
Ingerlatsinermi sippuineq isumaginnittoqarfimmi annermik pisimavoq angerlarsimaffiup avataanut inissiisoqartarnerani 19,1 mio koruuninik sippuisoqarsimalluni, utoqqaat illuini najugaqatigiiffiinilu ingerlatsinermi missingersuusiarineqarsimasunut sanilliullugit 10 mio. koruuninik sippuisoqarsimavoq. Ataatsimut isigalugu isumaginninnermut ataatsimiititaliami 16.5 mio. koruuninik sippuisoqarsimavoq.
Inerisaanermut ataatsimiititaliami katillugit 4,3 mio. koruuninik sippuisoqarsimavoq. Suliassaqarfimmi tassani pingaarnertut Majoriami atuarfeqarfimmilu sippuinermut pissutaapput.
Aningaasaqarnermut inuussutissarsiornermullu ataatsimiititaliaq 2,5 mio. koruuninik atuinikinneruvoq.
Teknikkimi ingerlatsinermi 6,7 mio. koruuninik sippuisoqarpoq, tamanna missingersuusiarineqarsimasunut sanilliullugu aningaasanik isertitakinnerunermik pissuteqarpoq, taavalu akissarsiatigut sippuisoqarluni. Sanaartornermut suliassaqarfimmi 17.7 mio. koruuninik atuinikinnerusoqarpoq.
Borgmesteri Stine Egede ima oqarpoq: Naatsorsuutinut atortorissaarutip nutaap atulernerani 2022-mi ilungersunartorsiortitsingaatsiarpoq, kukkunersiuinermi takussutissatut paasissutissat pissarsiariniarneri sivisusimavoq tamannalu aamma kukkunersiuisut taakkartorpaat. Oqiliallappungali maanna naatsorsuutit naammassimmata aammalu akuerineqarmata, qinersiviup matuma ingerlanerani 2023-mut naatsorsuutit akuerineqarnissaat sukataarluta sulissutigaarput.
Kommunalbestyrelsip immikkut ittumik ataatsimiinnermini ukiuni qulini siuliini aningaasat tigoriaannaat ineriartorsimanerat pillugit ilisimatinneqarpoq. Ukiuni siuliini sisamani kommunip akiitsutigut inissisimanerata ineriartorsimanera aamma takussutissami matuma kingulianiittumi saqqummiunneqarpoq.
