Kommune Kujallermi ilinniakkat atorfissaqartinneqarluartut ilagaat Isumaginninnermi siunnersortit, pisariaqartinneqarluarmatalu aamma ilinniartunut inissaqartitsisoqarpoq.
-Isumaginninnermik Ingerlatsivitsinni isumaginninnermut siunnersortit atorfissaqartilluarpagut, aamma isumaginninnermut siunnersortinngorniat. Taamaattumik ukiup matuma aallartinnerani ilinniartoqalernissarput nuannaarutigingaarpara, ilinniartunummi aamma ilinniarfittut tunniussassanik ulikkaarpugut, Kommune Kujallermi Isumaginninnermi pisortaq Nielsine Petersen nuannaarluni oqarpoq.
Kommune Kujallermi Isumaginninnermi siunnersortitut ilinniartunngortussaq februarip allaqqaataani pisortanit ikiorsiissutilerifimmi aallartissaaq.