Kommune Kujalliup Innovation South Greenland 2019-imi pilersippaa, siunertaallunilu kujataani inuussutissarsiornerup iluani ineriartortitsinissaq. Inuussutissarsiutit ukkatarineqartussat tassaallutik; nunalerineq, takornariaqarneq, nerisassat, UNESCO-p kingornutassiaqarfii, aalisarnermik piniarnermillu inuussutissarsiorneq inuussutissarsiutillu allat.
ISG-llu Naalakkersuisut kiffartuussinissamik isumaqatigiissutaat aqqutigalugu Nunalerinermut Siunnersuisoqarfik aamma ingerlappaa.
Isumaqatigiissut nutaaq aqqutigalugu nunap immikkoortuani inuussutissarsiornermik ineriartortitsinermi sulinerup ingerlaannarnissaa qulakkeerneqarpoq, tamatumalu saniatigut aaqqiissutissanik nassaartoqarpoq kommunip aningaasaqarnikkut unammilligassai inuussutissarsiornermillu ineriartortitsinissamik pisariaqartitsineq oqimaaqatigiissaariffigineqarsinnaaqqullugit. Kiffartuussinissamik isumaqatigiissut katillugit 600.000 koruuninik pitsanngorsaatitaqarpoq, tamannalu kiffartuussinerup pitsaassusianut sunniuteqarnavianngilaq.
Tamatuma saniatigut suliassat nutaat ilanngunneqarput, soorlu kommunip inuussutissarsiortullu akornanni qaninnerusumik suleqatigiinnerulernissaq, takornariaqarnermut periusissiaq nutarterneqarnissaa, UNESCO-mut tunngasunik suliassat erseqqissarneqarnissaat nunallu immikkoortuani nerisassat ilisarnaataannik nittarsaassineq.
Suliffimmi eqqissisimaneq siunissamullu isumannaatsumik atugassaqarneq
ISG-mi siulersuisuni siulittaasup Steffen Lundip isumaqatigiissutip nutaap pingaaruteqassusia erseqqissarpaa: “Ukiunut marlunnut isumaqatigiissut eqqissisimanarpoq ersarissumillu sinaakkuteqarluni, taamaalilluta inuussutissarsiornerup nukittorsarnissaa ineriartortitsinermillu suliniutit tapersersornissaat pingaarnerutissinnaagatsigik. Aningaasaqarnikkut pissutsit eqqumaffigisimavagut, siulliullutalu pitsanngorsaaffigisinnaasagut nassaarisimavagut, suliatsinnut kalluaasissaanngitsunik - ukiunilu marlunni tulliuttuni suliassat pingaarnerit pingaarnersiorneqarsimallutik.”
Kommune Kujallermi borgmesterip Stine Egedep nunap immikkoortuani periarfissat uku tikkuarpai:
“Kommuni sipaarniuteqartariaqaraluartoq 2026-miit attaveqaatit nutaat periarfissanik nutaanik ammaassissapput, ilaatigut aatsitassarsiornermi suliffissanik aamma mittarfissap nutaamiit Eqalugaarsuit Kangerluannut aqqut nutaap suliarineqarneranik. Tamatuma saniatigut takornarialerinermi attaveqaatinillu suliaqarnermi pitsanngorsaajuarnissaq naatsorsuutigaarput, pisortat namminersortullu peqataatillugit. ISG suliassaqarfinnut assigiinngitsunut pingaarutilimmik inissisimaffeqarmat, isumaqatigiissut manna aqqutigalugu nunap immikkoortuani periarfissarpassuarnik atorluaanissamut tunngavissaq nukittorsarniarparput.”
Kommune Kujalleq aamma ISG Kujataani ineriartortitsinermik siuarsaanermik, suliniutinik nutaanik - nutaaliornermillu siuarsaanermik pingaartitsillutik qanimullu suleqatigiinnermik ingerlatitsiinnarnissartik qilanaaraat.