Timersorneq peqqinnerlu nukittorsarniarlugit Kommune Kujalleq aamma Kalaallit Nunaanni Timersoqatigiit Kattuffiat Kujataanni timersornerup tungaatigut pitsaanerusunik sinaakkusiuumallutik nutaamik isumaqatigiissusiorput. Isumaqatigiissut ukiuni pingasuni atuussaaq, Bolethe Stenskov isumatigiissummut nutaammut qulaajaasussanngortinneqarpoq.
- Pingaarnertut suliassaraara ulluinnarni aalanermik atugaqarneq meeqqanut nalinginnaalissasoq. Inuunerminni nassatarissagamikku, neriuppunga aamma innuttaasut kajumissutsiminnik peqataalissasut, nutaamik eqqarsartariaaseqarneq nassarlugu ammaffigalugulu periarfissatsialaat akorluarneqarsinnaammata. Bolethe Stenskov oqarpoq.
Bolethe Stenskovip suliniummik aqutsisunngornera nalaatsornerinnaanngilaq. Bolethe ilaatigut siulittaasuusimavoq maannakkullu Kalaallit Nunaanni Timersoqatigiit Kattuffiannut siulittaasumut tullersortaalluni, tamatuma saniatigut 1992-mili timersoqatigiiffinni assigiinngitsuni ilaasortaasimavoq.
Sakkussaq pitsaasoq
Bolethe Stenskov ulluinnarni Kommune Kujalliup Kulturimut sunngiffimmullu immikkoortortaani timersornermut peqatigiiffilerinermullu siunnersortitut atorfeqarpoq. 2023-mi timersornermut peqatigiiffilerinermullu siunnersortitut atorfitsinneqarpoq.
-Ataataga palasiunikuugami nunatsinni angalasarnikooqaagut. 1979-mi Nanortalimmut nuukkatta timersorneq kattiffilerinerlu soqutigisarilerpakka. Bolethe Stenskov oqaluttuarpoq.
Bolethe meeraanerminiilli timersornerup silarsuaanniilerpoq. 1992-mi Nanortalimmi timersoqatigiinnut ilaasortanngorpoq, aammattaaq timersornerup tungaatinut arnanut maligasiuisuusimalluni. Tamatuma saniatigut Taekwondomi qernertumik qitequteqarpoq aamma Inuit pinnguaataanni unnammersuarnermi ataatsimiititaliami dommeriuvoq.
Bolethep suliffittaamini pingaarnertut uku naapitassarai:
- Amerlanerusut aalasalissapput: Sammisat innuttaasut pisariaqartitaannut naleqqussakkat, soorlu atuarfiit, peqatigiiffiit nunaqqatigiit suleqatigalugit.
- Ilaasortat kattuffii: Sakkussat tapersiissutillu nutaat atorlugit nammineq kajumissutsimik peqatigiiffitsigullu sulinerup nukittorsarneqarnera.
- Suleqatigiinneq pitsaasoq: Ineriartorneq pitsaanerpaaq qularnaarumallugu nunat tamakkerlugu najukkanilu suliallit ataqatigiissaakkamik suleqatigiinnerat.
-Isumaqarpunga kajumissutsimik peqataarusussuseq nukittorsartariaqartoq. Peqatigiiffiit aqutsisunit nukittorsarneqartariaqartut malunnarpoq. Taamaattumik kajumissutsimik suliaqarnermi sakkussanik ingerlatsinernillu ineriartortsinerup attatiinnarneqarnissaa pingaaruteqarpoq. Nukissanik annertusaanissaq pisariaqarpoq, taamaalilluta Kalaallit Nunaata kujasinnerusortaani pissutit tamaasa sillimaffigisinnaaniassagatsigit.
Siunissamut takorluukkat assigiit
Kommune Kujallermut isumaqatigiissut 2025-miit 2027-mut atuussaaq, ataatsimut takorluukkat suliniutinik tapertaqartinneqassapput soorlu Active Healthy Kids Network (meeqqanut peqqissunut eqqeersimaartunullu sammisaqarfiusoq) atuarfimmi aalanermik sammisaqarfiusoq, Game Greenland, aqqusinermi timersornermik peqataatitsiviusoq kiisalu nammineq kajumissutsimik sulineq.