Kommune ingerlatsinermut sanaartornermmullu 663 mio. koruuninik missingersuusiorpoq. Akileraarut allannguuteqarani 27 %-iuinnassaaq.
Eqqagassalerinermut anartarfilerinermullu akit kiisalu teknikkimut tunngasutigut sullissinermut akit qaffanneqassapput.
Isumaginninnermut missingersuutissat pissutigalugit Aningaasaqarnermut Inuussutissarsiornermullu Ataatsimiititaliami kiisalu Inerisaanermut Ataatsimiititaliami missingersuutit katillugit 20 mio koruuninik ileqqaarniarfigisariaqarsimapput.
Borgmesteri Stine Egede ima oqarpoq: ”Missingersuusiorneq assorsuaq ilungersunarsimavoq, ileqqaarutissat nassaarinissaat pisariaqarsimalluni kiisalu isumaginninnermut tunngasut ilaanni oqartussaaffik Naalakkersuisunit utaqqisaasumik atorunnaarsinneqarsimalluni. Kommunalbestyrelsi siusinnerusukkut aalajangerpoq ingerlatsinermut missingersuutini 70 mio koruuninik ileqqaartoqassasoq isertitat aningaasartuutillu oqimaaqatigiilersissinnaajumallugit. Akileraartarnermik Aqutsisoqarfimmut kiisalu Namminersorlutik Oqartussanut akiitsut akilerneqartariaqarput.”.
Isumaginnittoqarfimmi meeqqanut inuusuttuaqqanullu kiisalu innarluutilinnut oqartussaaffiup Naalakkersuisunit atorunnaarsinneqarallarsimanera apeqqutaatillugu missingersuutit Kommunalbestyrelsimit akuersissutigineqarsimapput.
Tamatuma saniatigut meeqqat inuusuttuaqqallu timersornerinut, inuussutissarsiutinik atuarfimmi sammisaqartitsinermut, illoqarfinni sanaluttarfinnut kiisalu Qaqortup illoqarfittut ukiuni 250-inngortorsiornissaanut katillugit 3 mio. koruuninik immikkoorsitsisoqarnissaanik Kommunalbestyrelsi aalajangersimavoq. Aammattaaq paaqqinnittarfinni nerisassanut ileqqaartoqannginnissaa Kommunalbestyrelsimit akuersissutigineqarpoq.
Stine Egede nangippoq: "Umiarsuit takornariutit akiliutaannit isertitassavut ukioq manna pernarluta tigusassavut qilanaaraavut angallannikkut atortulersuutinik takornarianillu sullissinerninik pitsanngorsaasinnaanngorniassagatta, kiisalu Folketingimiit 2,3 mio. koruuninik pissarsivugut Kujallermi meeqqanut kiisalu inunnik innarluutilinnut sammisumik pinaveersaartitsinermut atugassatsinnik. 2025 ileqqaarniarfiullunilu pisariillisaaviusussaagaluartoq aamma nuannersortaqarpoq. Nuannaarutissaavortaaq mittarfissamiit Eqalugaarsuit Kangillernut aqquserngup pilersaarusiorneqarnera Naalakkersuisut peqatigalugit nangissagatsigu, taamaalilunilu Narsamut kiisalu Tunulliarfimmut qaninnerulissalluni”
Stine Egede ima naggasiivoq: "Suleqatigiinnermut pitsaasumut kommunalbestyrelsimut ilaasortaaqatikka qutsavigaakka kiisalu kommunip aningaasaqarnera ilorraap tungaanut aallarteqqinniarlugu aalajangigassat ilungersunartut pingaaruteqartulli ataatsimoorfigisimagatsigit qujanera oqaatigeqqikkusuppara."