Sapaammi decembarip aallaqqaataani innuttaasunut tamanut illoqarfiup qeqqani juullerpalaartitsisoqarpoq. Tissaluttup asseqanngitsup sanianiippoq orpik napparneqarsimasoq. Ukiup taarnerani orpik qaammaqqutaassaaq.
Juullerpalaarneq aallarnerlugu illoqarfiup qeqqani meeqqerivinneersut meeqqat annerit aammalu Wilhelm Lyngep erinarsoqatigiivi erinarsorlutillu tussiarput.
-Juullip qaammataa aallarnerlugu orpiup eqqaani aammaarluta katersuuppugut, meeqqavut juullip inuanik naapitsinissamut erinisoqisut peqatigalugit tamatta susassareqatigiiffitsinni katersuuppugut. Orpinnguaq kusanaqisoq illoqarfimmit ikinngutigisatsinnit tunissutisiarput paarilluassavarput. Taarnerani juullip tungaanut qaammaqqutigissavarput, borgmesteri oqalugiarnermini taama oqarpoq.
Juullip anersaava ataavartikkumallugu ataatsimoornissarput qanilaarnissarpullu eqqaamasassagipput Stine Egedep oqalugiaammini ilaatigut oqarpoq.
-Neriungaarpunga juullikkunni meerartatta piffissaqarfigineqarluarneq, toqqissisimaneq, asanninneq nuannaarnerlu misigissagaat. Asasakka innuttaaqatikka, sapaassuarmi pilluaqqoqqippassi juullissamilu pilluaqqungaarlusi, Stine Egede naggasiivoq.
Naggasiutigalugu meeqqat "nissimaannguaq" nipituumik tallimariarlutik erinarsoreeraallu juullip inua takutitsisarfimmut qaqivoq, juullip inua 10-niit ammut kisitsineratigut orpik kiisami ikinneqarpoq.
Stine Egedep oqalugiaataa tamaat uani atuaruk: