Persuarsiorfiusumik tunniussinermi borgmesteri Stine Egede, Qaqortumiillu meeqqat isummersorfiineersut Milan Møller aamma Mila Mølgaard attaveqaatit atorlugit peqataapput.
- Qujamasuutigingaarpara internetsimi nittartakkanik atuinermi meeqqat illersorneqarnissaat pillugu eqqartuiniarlusi aalajangiussaqarsimagassi, ukiarlu ataatsimeersuaarnissinni sammisasi aalajangersaganngorlugit maanna politikerinut ingerlatitseqqikkassi, Stine Egede oqaaseqarnermini ilaatigut taama oqarpoq.
Aalajangersakkami nittartakkami eqqunngitsuliortoqarsimatillugu qanoq iliortoqarsinnaanera pillugu paasititsiniutinik suliaqartoqartalernissaanik, aamma inersimasunut inuit attaveqaqatigiittarfinnik qanoq atorneqarnissaannik pikkorissaasoqartalernissaa ilaatigut oqariartuutigineqarput.
-Tamanna isumassarsiatsialaavoq, internetsimi nittartakkanik atuinermi eqqunngitsuliortoqarsimatillugu meeqqat illersorneqarnissaat angajoqqaanit inersimasuniillu eqqummaariffigineqarnerulerpat, inersimasullu qanoq atuinissamut ilisimasaqarnerulerunik qularnanngilaq aamma ullumikkorniit torernerusumik atuilerumaartut. Taamaattumik suliniartoqarnissaanut suleqataarusunnarpoq, Stine Egede tapersiilluni oqarpoq, nangillunilu…
- Ataatsimeersuarnissinni politikerinik peqataasoqarnikuuvoq, neriuppungalu aamma taakku inatsisiliornerni qaammarsaanissanullu sulianik kivitseqataajumaartut. Uanga aamma peqataarusuppunga, ukulu tunniussani kommunalbestyrelsimi ilaasortaqatinnut ingerlateqqissavakka, Stine Egede naggasiivoq.
Tallimanngornermi novembarip 29-anni aalajangersakkat tunniunneqarput.