Kulunnguaq Adolfsen 24-nik ukioqartoq, ukiuni sisamani annertuumik imigassamik atuereerluni maanna ukiuni marlunni qaammatinilu pingasuni qaatusimavoq. Imigassamillu atuiunnaarnerminiit allanut ujartuiunnaarluni nammineq imminut aallaavigaluni eqqissilluni inuunermik atuilersimanini qujamasuutigalugu.
Inuunermini ullumikkut killifigisaminut aqqutimini ikiortissarsiortariaqarsimavoq, ukiunimi sisamani imigassamik annertuumik atuinermini inuunerisimasaa allarluinnaasimavoq.
Eqqissiviitsutut inuuneq
Kulunnguaq Adolfsen meeraanermini imigassartorfiusumi peroriartorsimavoq, taamaammallu inuusuttuunermini imigassamik atuinissani nalinginnaasutut isigisimallugu.
-Meeraaninni angerlarsimaffimmi imigassamik atuiffiusumi peroriartorpunga, ataatamami imigassamik atuisarnerani inuit imigassamik aalakoornartumik atuisartut nalinginnaasutut isigisarsimavakka. Imigassarlu atorneqartillugu tujorminartunik angerlarsimaffitsinni ilaanni pisoqartarpoq, Kulunnguaq Adolfsen oqaluttuarpoq.
Kulunnguaq Adolfsen inuusuttunngornermini nammineerluni imigassamik aalakoornartumik atuisalerpoq, ikinnguterpassuamilu akornanni imigassartoqatissaminik ujartuisarluni.
-Imigassamik atuilerninni pinngitsuuisinnaajunnariartuaarpunga, piffissallu sivitsoriartornerani atuisarnera annertusiartuinnarpoq. Pinngitsuuisinnaajunnaarninni eqqissiviitsuuvunga, kisimiillunga eqqissisimaarsinnaananga ikinngutinnillu ujartuiinnaavillunga ulluinnaqarlunga, Kulunnguaq Adolfsen oqaluttuarpoq.
Ikiortissarsiorneq
Kulunnguaq Adolfsen meeraanermini tujorminartunik aqqusaagaqartarnini pillugu oqaloqateqartarsimanngilaq, misigisimasallu qamani toqqortikkatut nammineq pigisimallugit.
-Ullut ilaanni ineeqqanni torersaallunga taskima iluani ilaqutariilluta asserput nassaarivara, kingorna eqqaamasaaruppunga. Silattoqqippunga ineeqqama iluani suna tamarmi sumi tamaaniittoq, kamassimavunga, ullorlu taanna anaanama oqaloqatiginerani ikiortissarsiortariaqalernera takusinnaalerlugu killippara, Kulunnguaq oqaluttuarpoq.
Ukioq 2021-mi oqaloqateqartalerpoq, misigisimasaminillu annissuisalernini inuttut oqiliartuutigalugu.
-Oqaloqateqartalernera iluaqutigeqaara, qamani toqqortiinnarsimasakka oqaloqatigiinnermi annissortarpakka. Ajornartorsiortillungalu imigassamut qimaasarnera takusinnaalerpara, imigassamillu atuiunnaarnissara siunniullugu, Kulunnguaq oqaluttuarpoq.
Kulunnguaq 2022-mi maajip qaammataani imigassamik atuiunnaarnissaminik eqqarsaatersuuteqalerpoq, aalajangerlunilu septembarip qaammataani imigassamik aalakoornartortalimmik atuinini unitsinniarlugu.
Ajornanngilaq
Imigassamik aalakoornartortalimmik atuiunnaarnermi inuunermik allannguineq Kuluunnguamut alloriarneruvoq annertooq.
-Aallaqqaammut ussernartorsiortaqaanga, ikinnguterpasuaqarnermiit kisimiileriataarneq allannguutit annersaaraat. Ikinngutit ataasiakkaat inuuninniiginnarput, taakku anaanagalu inuunermik allannguininni annertuumik tapersersortigivakka, Kulunnguaq Adolfsen oqaluttuarpoq.
Kulunnguaq Adolfsen imigassamik atuinermini eqqissiviitsutut inuuneqarsimasoq allannguinermini kisimiilluni eqqissisimaarsinnaalerpoq, inuunerminilu imigassartunngikkaluarluni allatut misileraalerluni.
-Kisimiillunga nammineq nuannarisannik aallutaqartalerpunga, kisimiillungalu eqqissisimaarsinnaanngorlunga. Killissara qaangerlugu nutaanik misigisassarsiortalerpunga, soorlu immami kinisimaartalerpunga timersortalerlungalu, Kulunnguaq Adolfsen oqaluttuarpoq.
Ikiortissaqartuaannarpoq
Kulunnguaq Adolfsenip ukiut marluk sinnerlugit qaatusimalluni inuunermini toqqissisimanartippaa, ullumikkullu isumaqarpoq imigassaq ajornartorsiutinit qimaaffittut aqqutaasariaqanngitsoq.
-Siusinnerusukkut imigassartorfiunngitsumik inuuneq qanoq toqqissisimanartigisoq ilisimasimagaluarukku qangali ikiortissarsiorsimassagaluarpunga, qamani toqqorteriinnarnanga, imigassarlu qimaaffigiinnarnagu. Inuusuttut arlaatigut misigisaqartarnermikkut imigassamut qimaasartut paasisinnaavakka, kaammattorusunnarpulli ikiortissarsiornissaannik. Ikiortissarsiornermi kanngunnanngilaq, massakkummi ikiortissarsiunngikkaanni taava qaquguussagami? Kulunnguaq apeqqusiilluni oqarpoq nangillunilu.
-Ullumikkut misigisanik nuanniissinnaasunik nalaataqartillunga qangatut imigassamut qimaaginnarnanga oqaloqatissarsiortarpunga, imaluunniit kisimiillunga eqqissisimaarnikkut timersorlungaluunniit assoroornikkut qaangerniartarlugit. Ullumi killiffiga nammineq inuttut tulluusimaarutigeqaara iluarisimaarlugulu, Kulunnguaq Adolfsen oqarpoq.