Siunissamut takorluukkat assigiit
Suleqatigiinneq pinngortitamik aallaaveqarluarluni inuunerup peqqinnartup aalaffiulluartullu siuarsarnissaanik ataatsimut angorusutaqarnermik toqqammaveqarpoq. Timersorneq inuiaqatigiinni imaqarluartuni peqataatitsiviusunilu naleqarluartutut Kommune Kujallermit kiisalu Timersoqatigiit Kattuffiannit isigineqarpoq.
Kommune Kujallermi Borgmesteri Stine Egede oqarpoq:
- Isumaqatigiissutikkut tassuuna nunaqqatitta timersorsinnaanerannut kiisalu ataatsimoornermik tarnikkut timikkullu naunnaaruteqarsinnaanerannut pitsaanerpaanik atugassaqartitsilissaagut. Kommunalbestyrelsi 2025-2027-mut missingersuutini 300.000 koruuninik timersornermut aningaasaliisimavoq. Sammisat immikkut aningaasaliiffigineqarsimasut ilaat tassaapput atuarfinni atuartitsinermi timimik atuineq kiisalu kommunitsinni nammineq kajumissutsimik sulineq.
Isumaqatigiissummi immikkut sammisat pingasut aallaavigineqarput:
- Amerlanerusut aalasalissapput: Sammisat innuttaasut pisariaqartitaannut naleqqussakkat, soorlu atuarfiit, peqatigiiffiit nunaqqatigiit suleqatigalugit.
- Ilaasortat kattuffii: Sakkussat tapersiissutillu nutaat atorlugit nammineq kajumissutsimik peqatigiiffitsigullu sulinerup nukittorsarneqarnera.
- Suleqatigiinneq pitsaasoq: Ineriartorneq pitsaanerpaaq qularnaarumallugu nunat tamakkerlugu najukkanilu suliallit ataqatigiissaakkamik suleqatigiinnerat.
Timersoqatigiit Kattuffianni siulittaasoq, Claus Nielsen, nangippoq:
"Kalaallit Nunaata 2030-mi timimik aalatitsiviunerpaanngornissaanik anguniagaqarpugut. Suleqatigiinneq manna aqqutigalugu anguniagaq taanna suli qanilleriaqqipparput, kommunillu allap anguniakkatsinnut kusanartumut ilanngunnera nuannaarutigaarput."
Sammisat suliniutilu aalajangersimanerusut
Suleqatigiinnerup ilaatigut imarissavai suliniutit soorlu Active Healthy Kids Network, atuarfimmi aalanermik sammisaqarfiusoq, Game Greenland, aqqusinermi timersornermik inuusuttunik peqataatitsiviusoq kiisalu nammineq kajumissutsimik sulineq. Tamatuma saniatigut timersornermi suleqataanissaq ajornannginerulersinniarlugu kajungernarnerulersinniarlugulu sulisoqassaaq.
Suleqatigiinneq aqutsisoqatigiinnik suleqatigiiffinnit marluusunit ilaasortaqartunit toqqammaveqarpoq, taavalu piffissami tamarmi suliniutit piviusunngortitserneqarnissaat ineriartortinneqarnissaallu suliniummik aqutsisumit qularnaarneqartassallutik.
Suleqatigiinneq qeratasumik ingerlanneqassanngilaq taavalu pisariaqartitsineq periarfissallu naapertorlugit naleqqussarneqartarsinnaassalluni. Kommune Kujallemi innuttaasut ataatsimoornerulernissaat, peqqinnerulernissaat atugarissaarnerulernissaallu suleqatigiinnit tamanit qilanaarineqarpoq.
PIVIUSUT
Suleqatissat:
● Kommune Kujalleq
● Kalaallit Nunaanni Timersoqatigiit Kattuffiat
Piffissaq suliniutip atuuffissaa:
2025-2027, sivitsornissaanut periarfissaqarluni.
Qitiutinneqartut:
- Amerlanerusut timiminnik atuissasut
- Ilaasortat kattuffii
- Suleqatigiinneq pitsaasoq
Missingersuutit:
Ukiumut 500.000 kr.
(200.000 kr. Kommune Kujallermit kiisalu 300.000 kr. Timersoqatigiit Kattuffiannit)
Attavissaq:
Timersoqatigiit Kattuffiat
Claus Nielsen