Folketingimi aningaasanut inatsisissamut Nunanut Avannarlernut aningaasaliissutit inissinneqarneranni aningaasat katillugit 2,3 mio. kronit Kommune Kujallermi meeqqanut aamma inunnut innarluutilinnut atorneqartussanngorlugit aningaasaliissutigineqarput.
-Kommune Kujallermi nunatsinni kommunini kisiartaalluta Nunanut Avannarlernut aningaasaliissutinik aningaasaliiffigineqarnerput nuannaarutigeqaara, Folketingimi ilaasortaatitatta Aaja Chemnitz sulilluarneratigut taama qulakkeerinnittoqarnera qujamasunnaqaaq, Borgmester Stine Egede qujamasulluni oqarpoq.
Aningaasat 2027-tikillugu aningaasaliissutaasut meeqqat inuusutullu atugaasa aamma inuit innarluutillit atugaasa pitsanngorsarnissannut atugassiaapput.
-Aningaasat meeqqat pinnguartarfiinik pitsanngorsaanernut aammalu inuit innarluutillit atugaannut pitsanngorsaanernut, soorlu pisortat suliffeqarfiutaannut tikikkuminarsaanernut iserfigiuminarsaanernut atorluarneqarsinnaapput, kommunitsinniillu atorluassaqaagut, Stine Egede oqarpoq.
Folketingimiit aningaasaliissutit 2025-mut 1,5 mio. kronit kiisalu 2026-mut aamma 2027-mullu 400.000 kronit aningaalissutaapput.