Ataatsimiisitsinerni borgmesterip kommunip aningaasatigut inissisimanera oqaluttuarissavaa aammalu aningaasatigut iluarseeqqinnissamut kommunalbestyrelsip suut aalajangiussimanerai eqqartussallugit.
Borgmesterip oqaatigiumavaa kommunip aningaasatigut ajornartorsiorneq tassanngaannaq pisimanngimmat.
Stine Egede oqarpoq: "Kommunip aningaasatigut inissisimaneranik ernummateqartoqarnera pillugu 2020-miit Namminersorlutik Oqartussat kommunillu allakkatigut attaveqaqatigiissimanerat pillugit kommunalbestyrelsimut 2024-mi novembarip 28-anni ilisimatitsivunga. Allakkat taakku politikerinut akisussaasunut saqqummiunneqarsimanngillat. Uannut pingaaruteqarsimavoq kommunalbestyrelse ilisimatissallugu, isumaqarama taamanili politikkikkut sulialinnut ilisimatitsissutaareersimasussaagaluartoq."
Ataatsimiisitsinerit sumiiffissai piffissaallu:
Nanortalik, ataasinngorneq decembarip 9-at, nal. 19-21 atuarfiup inersuaani.
Qaqortoq, pingasunngorneq decembarip 11-at, nal. 19-21 atuarfiup inersuaani.
Narsaq, sisamanngorneq decembarip 12-at, 19-21 timersortarfiup cafeteriaani.