Ilisimaarilluinnarpara politiit sulisussameertut, aammalu suliarisartagaat ikiliartoratillu oqiliartunngitsut. Taamaattumik nasaarfigaassi ilungersorlusi ullut tamaasa tunniussaqartartusi.
Aningaasarsiffinni unnukkut unnuamilu aqqusinermi eqqissisimatitsinissaq siunertaralugu angalasarunnaarnerat innuttaasunut toqqissisimannginnermik ernumanermillu pilersitsisartoq peqqinnanngilaq. Kinaluunniit unnuarsioriarnissaminut, imaluunniit pulaareerluni angerlarsinnaasariaqarpoq ernumanani ersinanilu.
Siornatigut Nanortalimmi Narsarmilu politiit arfineq marluk tikillugit sulisuusarsimapput, Qaqortumi 14 tikillugit sulisarsimapput. Maanna pissutsit allanngorluinnarsimapput, naak suliarineqartartut immaqa kisitsisitigut ikilisimagaluarlutik, taamaattoq oqimmaannerulersimapput.
Ikiaroornartumut akiuiniarneq pisinnaanngilaq assassaqartinneqannginnami. Kujataaniit tusaqqammerparput aningaasat 1,2 mio missaanniittut arsaarinnissutigineqartut. Ukiualuit matuma siorna 7 mio sinnillit arsaarinnissutigineqarput.
Taamaattumik Naalakkersuinikkut iliuuseqartoqartariaqalerpoq, nunatsinni inatsisaattuliornerit anngiortumillu annertuumik aningaasarsiornerit akiortariaqalerpagut. Ikiaroornartoq patsisaalluni ilaqutariit aserortikkat tamatuma kingunerisaanik meeqqanik arsaarinninnerit meeqqap inuuneranik aseruilluinnarsinnaasut amerlavallaaleqaat.
Taamaammat aningaasaliisartut tikillugit paasitinneqartariaqalerput, nunatsinni politiit nungukkiartuinnarneri sunik tunngaveqarnersut. Ukiorpassuarni aningaasarsiat nikinganerujussui eqqartorneqartuarsimapput. Aningaasarsialli kisimik patsisaanngittut paasinarsiartorpoq. Atugassarititaasut, suliat oqimaattut amerlaneri, qasuersaarfeqanngittarneq, qitiusumit aqunneqarpallaarneq qatsunneqartartoq paasisarpara.
Stine Egede, Borgmesteri.