Podcastimi allami inuunermi ilungersunarnerpaasinnaasartut eqqartussallugit periarfissinniarneqarpoq. Podcastimi nutaami Najaaqqami podcastimi, Kommune Kujallermi pinaveersaartitsisoq Najaaraq Jakobsen assigiinngitsunik inuunermi ilungersunartorsiornermik misilittagalinnik pulaartoqartassaaq.
-Eqqartuinikkut pitsanngortoqarsinnaammat. Imminut toquttarneq pinaveersaarniarlugu eqqartuinikkut pitsanngorsarneqarsinnaagami, soorunalimi mianernarpoq qulequtaq, kisiaani peqqinnartumik eqqartuigaanni taanna anguneqarluarsinnaagami. Najaaraq Jakobsen taama oqarpoq.
Podcastimi maanna immikkoortut tallimat saqqummersimalerput. Taakkunani immikkoortumi ataatsimi Arnârak Patricia Bloch pulaartuuvoq, Arnâqqap ilisimatusarnermini Ph.d.-liornermini imminut toquttarneq sammivaa, maluginiarsimallugulu Allorfimmut ikiortissarsiorlutik saaffiginnittartut amerliartortut.
Najaaraq Jakobsen aamma isumaqarpoq tarnikkut peqqissuunermut isiginnittaaseq allanngorsimasoq.
-Kingumut qiviassagaanni qangaanerusumiit eqqartueriaaseq allanngornikooqaaq. Qangaanerusormi paqumigineqarsimasut ullumikkut ammanerusumik eqqartorneqaratalernikuupput, ullumikkummi tarnikkut peqqissuunissamut ammanerusumik eqqartueriaaseqalernikuuvugut. Najaaraq Jakobsen taama oqarpoq.
Kommune Kujallermi pinaveersaartitsinermi siunnersortit sammisat oqimaassinnaasut itisilerlugit eqqartortassavaat inuit imminut toquttarnerup annertunerusumik eqqartornissaanik pisariaqartitsisut tusartikkumallugit. Kujataani ikerasaat sumi tamaani innerat aammalu kommunip aningaasaqarnikkut ilungersunartorsiornera pissutigalugit Najaaraq isumaqarpoq digitaliusunik atortorissaarnikkut amerlanerpaat tusarnarsinnaarsinnaanerat pingaartuusoq.
-Nalunnginnakku aamma avataaniik, soorlu massakkut kommunemi angalaneq unitsinnikuuvoq, tassuuna anguniagassagut angusinnaajunnaarnikuuagut nunaqarfinni, tassuunalu illoqarfiit aamma matoqqanerulerlutik, taava una podcast sananeqarpoq sumiiffiit matusimanerusut apuuffigerusullugit, kisianni tupalaarpunga qanoq tusarnaartoqartigisimanersoq. Najaaraq nassuiaavoq.
Podcasti siunissami atorluarneqassaaq. Eqqartorneqartarumaartut ilagaat tarnikkut nappaatit.
-Yellow September pereermat tassunga killikkallarpoq, tulliuttussat ADHD pillugu tunngasarumaarput, AHDH aamma siammasikkami, kiisalu isumassaarunneq, isumatsassimangaarneq, autismi, OCD, tamakku iserfigiumaarpakka, taavalu taakkununnga iiasartakkat sunniuttarneri sammisarumaarlugit. Najaaraq oqaluttuarpoq.
Najaaraq Jakobsenip pinaveersaartitsinikkut ilaatigut suliani ataatsimeersuarnermi Qamani 2024-mi Nuummi novembarip 26-anni 27-annilu pisussami saqqummiutissavai.
Najaaqqami podcast Spotifykkut tusarnaarsinnaavat aammalu Instagramikkut Facebookikkullu malinnaavigisinnaallugu.
|
Tusaannga Kisimiinngilatit. Piffissani inuunermi pisumiluunniit artornartorsiorfimmi, nammineq sapikkaminnik pisoqaraangat, inuit amerlanerpaat tusaaneqarnissartik pisariaqartittarpaat. Tusarnaarnissamut piffissaqarpugut. Tusaanngap siunnersortai tusarnaartarput, unammilligassavillu oqaasertalernissaanut ikiorsinnaallutit. Aamma illit inuuninni pissutsit artornartut qanoq iliuuseqarfiginissaanut sakkussannik tunisinnaavaatsit. Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat. Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit allallutilluunniit. Telefon: 80 11 80 SMS: 18 99 Ammasarfiit: Tusaannga ullut tamaasa ulloq unnuarlu ammasarpoq. Tusaannga - tusaavatsigit
Tigulaarfigisaq: Isumaginninnermut aqutsisoqarfik https://socialstyrelsen.gl/4_tilbud_til_borgerne/tusaannga?sc_lang=kl-gl |
