Kommune ullumikkut meeqqanut tunngasunik suliassaaterpassuaqarpoq sulisussaaleqillunilu, pingaartumik Nanortalimmi Qaqortumilu inatsisit malillugit suliassat suliarinissaannut sulisussaaleqilluni. Taamaammat Borgmester Stine Egede 2024-mi septembarimi Naalakkersuisunut isumaginninnermi suliassalerisunik amigaateqarneq pillugu ikiorneqarnissamik noqqaassuteqarluni saaffiginnippoq.
-Suliassat meeqqanut, inuusuttuaqqanut innarluutilinnullu tunngasut suliarisinnaajumallugit ukiuni marlussunni siunnersortinik avataaneersunik atuisariaqarsimavugut. Taakku suliaqarsimaqaat namminerlu sulisutsinnut oqilisaassisimaqalutik, aningaasaqarnittali sinnersortinik atuisinnaassuserput killilerpaa taakku kommunimut akisoqimmata, borgmesteri Stine Egede tikkuaavoq.
Borgmesterip ikioqqulluni noqqaassuteqarnerata kingorna isumaginninnermi sulisoqarniarneq kiisalu suliassaqarfinni assigiinngitsuni suliassat nalunaarsorsimasut amerlassusiat pillugu paasissutissanik Naalakkersuisunut nassiussisoqarpoq. Isumaginnittoqarfimmi innarluutilinnut suliat 300-iunerannik kiisalu meeqqanut inuusuttuaqqanullu suliat ammasut 857-iunerannik aammalu suliarinissaanut nukissaqannginneranik kommune Naalakkersuisunut ilisimatitsissuteqarpoq.
-Isumaginnittoqarfimmiit isumakuluutigineqartut soorunami assorsuaq pimoorullugit tiguagut. Ikioqqulluta noqqaassuteqarnitsinnut Naalakkersuisut aallaqqaammulli tusaaniarsimapput. Naalakkersuisut ikiorsiinerat qanoq ittuussanersoq pissanngatigisimavara. Uannut pingaarnerpaaq tassaavoq innuttaasut pisinnaatitaaffigisamittut ikiorneqassasut, maannalu taama pineqartussanngorput, Borgmesteri oqarpoq.
Tassa imaappoq suliassaqarfinni taakkunani aqutsineq ingerlatsinerlu Meeqqanut Inuusuttuaqqanullu Naalakkersuisoqarfimmit isumagineqarallassaaq. Isumaginninnikkut suliassat sinneri, soorlu pisortanit ikiorsiisarneq utoqqarnullu tunngasut kommunimit isumagineqassapput.
-Ullumi isumaginnittoqarfimmi sulisut tamaasa pissutsit qanoq innerannik ilisimatippavut, aqutsinissamullu pisinnaatitaaffimmik Naalakkersuisunut pitsaasumik tunniussisoqarnissaa qilanaaraarput meeqqat, inuusuttuaqqat innarluutillillu kommunimi sullinneqarnissaat pisariaqartoq qularnaarneqarsinnaaniassammat, Stine Egede oqarpoq.