Piffissami kingullermi Qaqortup illoqarfiani inuusuttuaqqat akornanni serlersaarinerit assigiinngitsut takussaaqqilerneranni pinaveersaartitsiniarluni Qaqortumi ornittagaq pisarnermiit ammatinneqarnerusussanngorpoq.
-Siusinnerusukkut Qaqortup illoqarfiani inuusuttuaqqat akornanni serlersaarisarnerit annertuut suliniuteqarnitsigut annikillisissimavagut. Piffissamili kingullermi serlersaarisarnerit assigiinngitsut takussaaqqilerneranni immikkut iliuuseqarluta novembarip qaammataani weekendit tamakkerlugit ornittagaq ammatissavarput, Kommune Kujallermi Ilaqutariinnut sullissivianni pisortaq Jakob Noahsen oqarpoq.
Narsami aamma Nanortalimmi ornittakkat nalinginnaasumik sapaatip akunnerini akissarsiffiusuni ammatinneqassapput.
-Narsami Nanortalimmilu ornittakkanik ammatitsisarnigut allannguuteqassanngillat, piffissamili kingullermi Qaqortumi pisut aallaavigalugit pinaveersaartitsineq annertusisariaqaratsigu immikkut ittumik ammatitsinissarput aalajangiussimavarput, Jakob Noahsen nassuiaavoq.
Ornittakkat tallimanngornermi ualikkut nalunaaqutaq sisamaniit sapaammi ullaakkut qulit tungaannut ammatinneqartarput.