Tallimanngornermi novembarip 15-ianni Qaqortumi ornittakkap iggavia meeqqanit utoqqarniillu ataatsimoorfiulluni nerisassiorfiussaaq.
-Meeqqat inuusuttullu utoqqarnik ataatsimooqateqartinniarlugit sapaatip akunnerata naanerani ataatsimoortitsilluta nerisassiortitsissaagut. Taamaaliornitsigut meeqqat utoqqaallu nerisassioqatigiinnermikkut nereqatigiinnermikkullu ataatsimoornissaannut periarfissikkusullugit. Neriuppunga ataatsimoorneq tamanit pissarsiffiulluni nuannisarfiujumaartoq, Kommune Kujallermi Ilaqutariinnut sullissivinni pisortaq Jakob Noahsen oqarpoq.
Ajarsivasimmi sulisut ilaqutariinnullu sullissivimmi sulisut suleqatigiillutik meeqqanik utoqqarnillu ataatsimoortitsissapput, pilersaarutaavorlu kingusinnerusukkut ataatsimoortitseqqilluni Ajarsivasimmi nereqatigeeqqittoqarumaarnera.