Arnaq ukiorpassuarni Meeqqerivik Narsarmiutap ingerlalluarnissaanik aqqutissiuusilluarsimasoq soraarninngorluni suliunnaarpoq.
-Ukiuni arlaqaqisuni meeqqeriviup ingerlalluarnissaanik aqqutissiuussilluarsimavutit, tamannalumi sulisut aalajaatsuuneranni atuisullu naammagisimaarinninnerannik takussutissaqarpoq, Thilda Thomsen suleqataasut sinnerlugit Marianne Nielsenip naggataarnerani oqaaseqarnermini ilaatigut taama oqarpoq.
Marianne Nielsen Meeqqerivik Narsarmiutami ukiuni 41-ni meeqqerisutut meeqqeriviullu pisortaatut sulinermini qiimalluni, suleqatikkuminarluni, naatsorsuutigineqarsinaalluni minnerunngitsumillu suleqatiminut ineriartortitserusulluni sulisimavoq.
-Kommune Kujallermiit qujarususuppugut sulilluarninni annertuumik meeqqanik inerititsisarsimaninni, ilaatigummi inersimasunngoreersimapput ilinniagaqalerlutik. Kommune Kujalleq sinnerlugu qujallunga soraarninngorninni ajunnginnerpaamik kissaappakkit, Kommune Kujallermi Meeqqeriveqarnermut pisortaq Rita Thomsen soraarninngortumut ilaatigut taama oqariartuuteqarpoq.
Marianne Nielsen sisamanngornermi oktobarip 31-anni naggataartinneqarluni soraarninngorpoq.