Arnat qitornallit angerlarsimaffimmi sakkortuuliorfigineqartartut saaffissaat Kommune Kujallermit amerlineqarput. Nanortalimmi qimarnguik oktobarip aallartinnerani ammarpoq.
-Arnat ikiortissarsiorlutik qimarnguiliaraangamik angerlarsimaffimminnit sunnguamilluunniit nassataqarneq ajorput. Taamaammat ineeqqamik atorunnagaannik tamanik pequsersukkamik aallarniuteqartarput, tassanngalu kommunimi ikiuisartumit katsorsarneqarlutik aallartittarlutik. Ilaqutariinnik sullissivimmi katsorsaanermut aqutsisoq Najanguak Knudsen oqaluttuarpoq.
Aallarniutissat saniatigut meeqqat Mary Fondenimit suli ikiorserneqartarput ulluinnarni ingerlaqqissinnaaqqullugit.
Najanguak Knudsen ilanngullugu oqaluttuarpoq arnat qaammatit pingasut tikillugit qimarnguimmiisinnaatitaasut, tamatumalu kingorna isumaginninnikkut siunnersortit tassunga tunngasumik naliliisapput, suliallu pisut ataasiakkaat aallaavigalugit aalajangiivigineqassallutik.
Qimarnguinniit ikiorserneqartariaqaruit, imaluunniit ikiorserneqartariaqartumik ilisarisimasaqaruit attaveqarfissat matuma kingulianiittut atorlugit attaveqarit.
|
Narsami qimarnguik
Ilaqutariit illuat ammanerani qimarnguimmi ilaqutariinnut siunnersorti saaffigineqarsinnaavoq: Nal. 8-16: 38 15 18 / 38 15 33
Suliffiup avataani socialvagt saaffigineqassaaq: +299 49 72 03
|
Qaqortumi qimarnguik
Ilaqutariinnut sullissivik ammanerani qimarnguimmi ilaqutariinnut siunnersorti saaffigineqarsinnaavoq: Nal. 8-16: 56 56 37
Suliffiup avataani socialvagt saaffigineqassaaq: +299 49 34 35
|
Nanortalimmi qimarnguik
Ilaqutariit illuat ammanerani qimarnguimmi ilaqutariinnut siunnersorti saaffigineqarsinnaavoq: Nal. 8-16: 61 40 82 / 61 40 81 / 49 74 57
Suliffiup avataani socialvagt saaffigineqassaaq: +299 53 75 41 |
|
Kikkut qimarnguimmiissinnaatitaappat?
• Kinaluunniit Arnaq qitornanilu timikkut tarnikkullu persuttagaasimasoq meeqqani ilagalugit qimarnguimmut qimarngusinnaatitaavoq.
• Kommune kujallermi innuttaassusillit KISIMIK arnat qitornallit qimarnguianut inississinnaatitaapput meerartaqarunik.
|