Kommune Kujallermi aningaasaqarnermut immikkoortortaqarfiup 2021-mi angajoqqaanut paarsisunullu akiliisussaatitaasunut akiligassatigut nukingisaarut atorsimasaa aammaarluni atorneqalissaaq.
Angajoqqaat paarsisullu akiliisussaatitaasut paaqqinnittarfinnut akiligassaminnik akiliisimanerlutik eqqumaffigisassavaat.
-Angajoqqaat akiligassaminnik akiliisarnissaannik kajumissaarpavut imaluunniit kinguaattoorutinik akilersuinissamut isumaqatigiissusiornissaannik kajumissaarlugit. Kommune Kujallermi aningaasaqarnermut pisortaq Arne Andersen taama nalunaarpoq.
Sakkortunerpaamik pisoqassappat meeqqat anisinneqarsinnaapput taamalu meeqqat utaqqisunut nutaamik inissittassallutik.
Kommunip periusaani nutaami tunngavigineqartoq tassaavoq Meeqqanut suli atualinngitsunut perorsaanikkut inerikkiartuutaasumik ulluunerani neqeroorutinut akiliuteqartarneq pillugu Namminersorlutik Oqartussat nalunaarutaat 2011-meersoq:
Akiitsoqarneq neqeroorutiniititsiunnaarnerlu
§ 12. Akiliisussaatitaasoq akiliisussaatitaasulluunniit akiliutissaminnut akiitsoqalerpata taannalu imaluunniit taakku akiliinissamik eqqaasinneqartaraluarlutik akiitsorisat akilersorneqarnissaat pillugu isumaqatigiissuteqanngippata § 13 naapertorlugu meeraq meeqqanut suli atualinngitsunut perorsaanikkut inerikkiartuutaasunik ulluunerani neqeroorummiitikkunnaarneqassaaq.
Imm. 2. Akiitsut ullormit eqqaasitsiffiusumit ullut 14-it qaangiutsinnagit akilerneqarpata meeqqanut suli atualinngitsunut perorsaanikkut inerikkiartuutaasunik ulluunerani neqeroorutiniititsiunnaarnissamik aalajangiineq atorunnaassaaq.
Imm. 3. Kingusinnerpaamik kommunalbestyrelsip akiitsoqarneq pissutigalugu meeqqap neqeroorummiikkunnaartinneqarnissaa pillugu akiliisussaatitaasumut akiliisussaatitaasunulluunniit nalunaarneranut peqatigitillugu tamanna pillugu aalajangiineq isumaginninnermi oqartussaasunut nalunaarutigineqassaaq.
§ 13. Meeqqamik meeqqanut suli atualinngitsunut perorsaanikkut inerikkiartuutaasunik ulluunerani neqeroorutiniikkunnaartitsinerit tamarmik qaammammik ataatsimik sioqqutsilluni ilimasaarereernikkut qaammatip ulluisa aallaqqaataannit atuutilersumik pisassapput.