Qaqortumi angerlarsimaffeqanngitsut kialaarfeqalertussanngornerat Isumaginninnermut Naalakkersuisoqarfimmiit aningaasaliisoqarneratigut piviusunngortussanngorpoq.
-Nuannaarutigivara Isumaginninnermut Naalakkersuisoqarfimmiit suleqateqarluarnikkut isumaginninnermi anguniakkatta ilaat, tassa Qaqortumi angerlarsimaffeqanngitsut kialaarfittaartussanngornerat piviusunngortussanngormat, tamannami pisariaqartinneqavippoq. Neriuppunga kialaarfissaq paarilluarneqarumaartoq, taamaanngippammi naliliiffigineqaqqittussaassammat, Kommune Kujallermi borgmesteri Stine Egede qujamasulluni oqarpoq.
Isumaginninnermut Naalakkersuisoqarfik aamma Kommune Kujallermi Isumaginninnermik Ingerlatsivik oktobarip 22-anni ataatsimeeqatigeereersullu piffissami qaninnerusumi kialaarfeqalernissaa qulakkeerneqarpoq.
-Namminersorlutik oqartussat angerlarsimaffeqanngitsunut kialaarfeqalernissaanut aningaasaliissutaat ukioq manna tunniunneqarnerisigut, piffissami qaninnerusumi kialaarfeqalernissaa qulakkeerparput, Kommune Kujallermi Isumaginninnermut Ingerlatsivimmi pisortaq Nielsine Petersen oqarpoq.
Qaqortumi angerlarsimaffeqanngitsunut kialaarfissaq decembarip aallaqqaataaniit atorneqarsinnaanngussasoq pilersaarutaavoq.