Ataqqinartut aalisartut, piniartut, nuliaasut aappaasullu, ullumi ullorsiornissinni uummammit pisumit pilluaritsi.
Aalisartut piniartullu inuussutissarsiutersi nunatsinni pingaaruteqarluinnartuuvoq, inuiaqatigiinni pilersuiffiusoq pinngitsoorsinnaanngisarput.
Nammineq pilersornissamut aqqutissiuinissigut maligassiuisuuvusi, qanortorlu tamanna kinguaariinniit kinguariinnut ingerlatinneqartuarili.
Aalisartut piniartullu ullorsiortarneranni soorlu eqqaasinneqartartugut aalisartutut piniartutullu sulinerup qanoq assigiinngiiaartigisinnaaneranik. Sila atoruminarsillaraangat amerlasuujulluta qutsassisarpugut, aammali ukiorluni nillertillaraangat, anorersuaqattaaleraangat aammalu ukiut ilaanni pisarnermiit sivisunerusumik sikorsuaqartillugu sivisuumik aallarsinnaajunnaarangassi nersortaqaassi, suliffissi imaannaanngissinnaasartoq aalajaallusi aalluttarassiuk.
Qujanartaqaaq ukioq kaajallallugu neqissaqartilluta, aalisagassaqartilluta allanillu mamartortugassaqartittuartaratsigut.
Ulloq manna aamma eqqaasitsisarpoq ilassinnik inuussutissarsiutissinnik suliaqartillutik imaatigut ajunaarsimasunik allatigulluunniit ajutoornikkut peerussimasunik, tamaasa qamani uummatitsinni eqqaamavagut.
Tamanik ajunngitsunik peqqinnissassinnillu kissaallusi, qanortoq ulloq nuannersumik atorisiuk.
Stine Egede, borgmesteri.