Februaarip qaammataani sikorsuit takkutiaarput juulillu 17-ata tungaanut sikorsuaqarluni, Nanortalik Qaqortorlu sikorsuarnit eqqugaanerpaapput. Tamatuma malitsigisaanik umiarsuit takornariartaatit 30-t tikinnissaraluat taamaatiinnarneqarput, nunallu immikkoortuani attaveqaatitigut ima ilungersunartorsiortitsoqartigaaq allaat Naalakkersuisut assartuinikkut periarfissat qulakkeerniarlugit qulimiguulinnik allanik atortitsisariaqarsimalluni.
Ukioq manna Kujallermi umiarsuit takornariartaatit aatsaat taama amerlatiginissaat naatsorsuutigineqarpoq. Takornarialerisut amerlasuut umiatsianik, umiarsuarnik bussinillu nutaanik pisaajortorput, amerlanerusunik atorfinititsipput kiisalu suliffeqarfimminnik annertusaasimallutik, takornariat amerlassangatinneqartut sullissinnajumallugit. Ajoraluartumik sikorsuaqarnerata malitsigisaanik umiarsuit takornariartaatit 30-t tikinngitsoorput, tamannalu takornarialerisunut annertuumik anningaasanik annaasaqartitsivoq.
Takornariaqarnermut kingunerluuteqartitsineq
Takornarialerisunut nutaanut umiatsianut, bussinut atortussanillu allanik annertuumik aningaasaliissuteqarsimasunut eqqugaanerpaappuut. Tamatumalu malitsigisaanik suliffeqarfiutiminnik matuseratarsinnaapput.
"Ajornerpaamik pisoqassappat takornarialerisut nutaat amerlasuut suliffeqarfiutiminnik matusissapput. Massakkut mittarfitaassatsinnut piareersarnitsinni takornariaqarnitta ineriartortinneqarneranut annertuumik kinguarsaataassagaluarpoq" bormesteri Stine Egede oqarpoq.
Takorniaqarneq kujataata siunissamut pilersaarutaanut pingaaruteqartumik inissisimasuusoq erseqqissaatigaa, aammattaaq tapersersorneqarnissaanik pisariaqartitsoqarnera eqqaallugu: "Takornariaqarneq annertuumik naatsorsuuteqarfigisimavarput, takornarialerisugut takornariat tikerarnissaannut periareersarniarlutik annertuumik suliniuteqarsimapput Kisianni taama ajutoortorqartillugu ikiunngikkutisigit ataatsimoorluta anguniakkatsinnut ajalusoortitsinnaavoq."
Aningaaseriviit aningaasaliisullu ilungersunartorsiornermut paasinnipput
Inatsisartuni itigartitsisoqaraluartoq Naalakkersuisut, aningaaseriviit aammalu Nalik Ventures pisoq ilungersunaraat. Suliffeqarfiit sunnerneqartut akiligassaannik akilersuinerannillu kinguartitsipput aningaasatigut oqimaatsorsiornerat oqilisaaviginiarlugit.
"Pisoq COVID-19-ip pinerasut immikkuullaritsigaaq, inunniillu pilersitaagani. Ajornartorsiut manna aaqqiiviginngikkutsigu piffiit takornarialeriffiusussat kujataani piareersimaffiginngitsooratarsinnaavarput, naatsorsuutigaarpullu suli amerlanerusut takornariartussaasut", borgmesteri kalerriivoq.