Ukioq manna ilinniartitaaneq pillugu paasissutissiineq Qaqortumi ingerlanneqarmat iluatsilluarpoq. Ilinniartut aammalu ilinniarfissaminnik ujartuisut pingasunngornermi oktobarip 23-anni Campus Kujallermut ornigupput, tassani ilinniarfiit suliffeqarfiillu assigiinngitsut suut neqeroorutigisinnaanerlugit Qaqortumi innuttaasunut saqqummiipput.
Ilinniakkami aqqutissiuisorpassuit suliffeqarfiillu sinnerlugit takkuttut Qaqortumi aggialluarnerini Kujallermi Majoriami aqutsisup Karoline Lundip periarfissatsialaasoraa takkuttorpassuit katersussallugit, naapinnermilu ilinniartut ilinniarfissaminnik ujartuinerminni suut atugassarititaanersut ilungersunartorfiusimanersullu ataatsimiissutigalugit eqqartorneqarput.
-Ataasiakkaarlusi ataatsimiisitsinanga, immitsinnut malinnaaffiginiarluta ilinniakkat nutaat takkussuuttut, assersuutigalugu KTI-mi Inuilimilu, eqqarsarlunga tamatta ammasumik avitseqatigiissinnaalluta. Karoline Lund pulaartuminut taama oqarpoq.
Ilinniarnertuut aqqutissiuussisui katersorneqarput
Sisamanngornermi oktobarip 24-anni Kujallermi Majoriap ilinniarfiit suliffeqarfiillu ilinniakkamik naammassisut atugaat periarfissaallu pillugit ataatsimut oqallinnissamut katersorpai.
Pingaartumik ilinniartunut aqqutissiuisut aammalu suliffeqarfiit assigiinngitsut Sisimiuneersut, Ilulissaneersut, Nuummeersut, Qaqortumeersut Danmarkimeersullu ornigupput, ornigunnerminni ilinniartuuteqartarnerminni misilittakkatik pillugit oqaluttuarput.
Peqataasut ilaatigut tassaapput, KAF (Ilinniartut Ineqarfiisa Allaffeqarfia), Odensemi Kalaallit Illuat, Aalborgimi Kalaallit Illuat, Nanortalimmi Kalaallit Illuat, KTI Jern og Metal Skole, Tasersuup Atuarfia, Nuernermik Ilinniarfik, GUX Sisimiut, Majoriaq Narsaq, Peqqissaanermik Ilinniarfik, Aqqut, Ilisimatusarfik, Campus Kujalleq, GTO Sisimiut, KNI, Inussuk, Perorsaanermik Ilinniarfik, Sulisartut Højskoliat, Nunatta Isiginnaartitsisarfia, Royal Greenland kiisalu Majoriaq Qaqortoq.
Periarfissat siammasinnerusut anguneqassapput
Sammineqartut pingaarutillit uani eqqartorneqassapput. Tamatuma saniatigut ilinniarfiit systemii amerlavallaarneri ajornartorsiutaavoq. Tamanna ajornartorsiummik annerusumik pilersitsisutut peqataasunit arlaqartunit isumaqarfigineqarpoq. Ilinniakkat nutaat aammalu ilinniartunut akisussaaffinnik nikititerinerni ilinniartunut periarfissanut ersernerlussaataavoq.
Majoriamiit annertuumik ernummatigineqartoq tassaavoq; ilinniartoq suliffimmik misiliiffigisani Majoriaq avaqqullugu toqqaannartumik soraarfigippagu Majoriap sulisuisa ilinniartup qanoq ingerlanera arajutsissavaat, taamamalu ilinniartup tapersersornissaa ikiornissaalu ajornarsissalluni. Taama oqarpoq Majoriami ilinniartunut aqqutissiuussisoq Najaaraq Ludvigsen