Lillian Møller aggustip aallartinnerani ilinniartitsisutut angalasartutut atorfinippoq. Lillian ilinniartitsisutut ilinniarsimasuuvoq ulluinnarnilu Kommune Kujallermi nunaqarfinnut savaateqarfinnullu angalalluni ilinniartitsisarnerup saniatigut savaateqarfimmi Uummannartiivaqqamiit attaveqaatitigut illoqarfinni nunaqarfinnilu ilinniartitsisarpoq.
- Nunaqarfinnut angalasarpunga, nunaqarfinni atuartunut atuartitsisarlunga, Kommune Kujallermi angalalluni ilinniartitsisoq Lillian Møller taama oqarpoq.
Tamanna kommunimi sumiiffinni angerlarsimaffinni ilinniartitsiviusunut, nunaqarfinni savaateqarfinnilu meeqqanut atuarnermik paarsilluarnerunissamik periarfissiivoq. Ilinniartitsisoq angalasartoq nunaqarfinnut savaateqarfinnullu angalasassaaq, meeqqat atuartinneqarnerisa pitsaassusaat qulakkeerniarlugu.
Tamanna qanoq ingerlassava?
Ilinniartitsisoq angalasartoq Lillian Møller pisariaqartitsineq malillugu nunaqarfinnut savaateqarfinnullu angalasassaaq.
-Pisariaqartitsisoqalernerani attaveqarfigineqartarpunga, aamma pisariaqartinneqartut aallaavigalugit ilinniartitsisarlunga, Lillian Møller oqarpoq.
Lillian Møller aggustip aallaqqaataani atorfinippoq angalallunilu atuartitsineq ingerlallualereerlugu.
- Kommune Kujalliup iluani nunaqarfinnut angalasarpunga. Narsarmijiniinnikuuvunga, Eqalugaarsunni, savaateqarfinnilu assigiinngitsuni, Lillian Møller oqarpoq.
Angerlarsimalluni atuartitsiviusut tassaapput: Kangerlua, Nunataaq, Kiattut, Eqalugaarsuit, Qanisartuut, Qassimiut, Saarloq, Saqqaa, Tasilikulooq aammalu Upernaviarsuk.